"ქალბატონებო და ბატონებო, მოგესალმებით ბორტზე", - ამიერიდან მისალმების ამ ფორმას, რომლითაც ბორტგამცილებლები მგზავრებს ესალმებიან გერმანული ავიაკომპანია Lufthansa-ს რეისებზე ვეღარ მოისმენთ.
გერმანიის ფლაგმანი ავიაგდამზიდავი გენდერულად ნეიტრალური ენის გამოყენებას გეგმავს, კომპანიის ეს გადაწყვეტილება შეეხება ყველა ავიაკომპანიას, რომლის მართვასაც Lufthansa Group ახორციელებს, მათ შორის Austrian Airlines, Swiss and Eurowings.
"მრავალფეროვნება უბრალოდ ცარიელი სიტყვა არ არის, არამედ Lufthansa- სთვის რეალობაა. გვსურს ასე გამოვხატოთ ჩვენი დამოკიდებულება", - განაცხადა ავიაკომპანიის პრესსპიკერმა.
ამიერიდან, ავიაკომპანია მგზავრებს მიმართავს შემდეგი სიტყვებით: "დილა მშვიდობისა", "დღე მშვიდობისა", "საღამო მშვიდობისა", ან "ძვირფასო სტუმრებო", ან "კეთილი იყოს თქვენი მობრძანება ბორტზე".
კონკრეტულად რომელ ფრაზას აირჩევს კონკრეტული რეისის ეკიპაჟი, გადაწყვეტს საჰაერო ხომალდის მეთაური.
გადაწყვეტილება დაუყოვნებლივ შევიდა ძალაში.
