ამის შესახებ განცხადება დღეს აჭარის ფინანსთა და ეკონომიკის მინისტრმა ვაჟა ბოლქვაძემ გააკეთა. მინისტრის თქმით, სამთავრობო კომისიამ უკვე დაამტკიცა 15 პროექტი და გამოავლინა 8 ინვესტორი.

"უკვე გადაწყდა, რომ 8 კომპანია ქობულეთის ტურისტულ ზონაში 15 სასტუმრო კორპუსს ააშენებს, ხოლო დანარჩენი კორპუსების და ინვესტორების რაოდენობა მოგვიანებით გახდება ცნობილი", - განაცხადა ვაჟა ბოლქვაძემ.

მინისტრის თქმით, 8 გამარჯვებული კომპანიიდან ერთი ბელორუსული კომპანიაა, რომელიც ქობულეთში სამ სასტუმროს ააშენებს.

ასევე არიან სომხური კომპანიები. კერძოდ კი 3 სომხური და 4 ქართული კომპანია.

მინისტრის თქმით, აღნიშნული პროექტის განხორციელება ხელს შეუწყობს რეგიონში დასაქმებას და რეგიონის ეკონომიკურ განვითარებას.

შეგახსენებთ, რომ ქობულეთში "თავისუფალი ტურისტული ზონის" განვითარების მიზნით, ე.წ "ფიჭვნარის" ტერიტორიაზე, ზღვიდან 140 მ-ის დაშორებით, ახალი სასტუმროების მშენებლობისთვის მთავრობამ პოტენციურ ინვესტორებს განსხვავებული შეღავათები შესთავაზა.

პროექტის თანახმად, ე.წ "ფიჭვნარის" ტერიტორიზე, გამოყოფილია მიწის 3 ნაკვეთი (საერთო ფართით 11,3 ჰა), რომლებზედაც დაგეგმილია 30 სასტუმრო კორპუსის მშენებლობა. განსაზღვრულია სასტუმრო კორპუსების 3 ტიპი. მშენებლობის მსურველს შეუძლია არჩევანი გააკეთოს.

ასევე, განსაზღვრულია, სასტუმრო კორპუსების სართულიანობაც: 5, 6 ან 7 სართული (42, 52 ან 60 ნომერი).

პროექტის თანახმად, სამშენებლო მიწის ნაკვეთის განკარგვა განხორციელდება სიმბოლურ ფასად, დამტკიცებული საპროექტო-სამშენებლო დოკუმენტაცია დამკვეთს გადაეცემა უსასყიდლოდ. ტერიტორია უზრუნველყოფილი იქნება საინჟინრო-კომუნალური ქსელებით და სათანადო ინფრასტრუქტურით.
იმ შემთხვევაში, თუ მშენებლობა დამთავრდება და ობიექტი ექსპლუატაციაში შევა 2011 წლის 1 აგვისტომდე, ინვესტორი 15 წლით მოგებისა და ქონების გადასახადებისაგან გათავისუფლდება.