გვატემალა რუსეთისგან ვაქცინის შესაძენად გადახდილი თანხის დაბრუნებას მოითხოვს.
გვატემალის ჯანდაცვის მინისტრის ამელია ფლორესის განცხადებით, მისმა მთავრობამ რუსეთს კორონავირუსის საწინააღმდეგო ვაქცინა Sputnik V-ის შესაძენად გადახდილი თანხის დაბრუნების მოთხოვნით მიმართა.
მისივე თქმით, რუსეთის მხარემ გვატემალას ჯერ კიდევ არ მიაწოდა ვაქცინის შეძენილი დოზები.
გვატემალის ხელისუფლებამ აპრილის დასაწყისში დაახლოებით 80 მილიონი დოლარი გადაიხადა რუსული ვაქცინის 8 მილიონი დოზის შესაძენად.
მთავრობის ინფორმაციით, ამ დროისთვის, მათ მხოლოდ 150 ათასი დოზა მიიღეს, მაშინ როდესაც კორონავირუსის გავრცელება პიკს აღწევს და ვაქცინის კრიტიკული საჭიროება დგას.
ამელია ფლორესის განცხადებით, გვატემალამ დაპირებული დოზების მისაღებად რუსეთის პირდაპირი ინვესტიციების ფონდს, რომელიც Sputnik V-ის გაყიდვებს ხელმძღვანელობს, 20-დღიანი ვადა მისცა.
რუსეთის პირდაპირი ინვესტიციების ფონდი ირწმუნება, რომ ვაქცინის დამატებითი დოზები გვატემალაში უახლოეს მომავალში ჩავა.
