საქართველოს ჯანდაცვის მინისტრი ეკატერინე ტიკარაძე კლინიკების ხელმძღვანელებთან შეხვედრას მართავს.
შეხვედრის დაწყებამდე ეკატერინე ტიკარაძემ განაცხადა, რომ იწყება პანდემიასთან ბრძოლის ახალი ეტაპი, მასობრივი ვაქცინაცია.
"ვმართავთ შეკრებას იმ კლინიკების წარმომადგენლებთან, რომლებიც ჩართულები არიან ვაქცინაციის პროცესში და ასევე, გვინდა, დავაანონსოთ, რომ დღეს იწყება საკმაოდ მნიშვნელოვანი პროცესი. უკვე ივლისიდან ველოდებით მილიონზე მეტ ვაქცინას და ჩვენ ვიწყებთ პანდემიასთან ბრძოლის ახალ ეტაპს, რომელიც გულისხმობს პანდემიის დამარცხებას მასობრივი ვაქცინაციით", - თქვა ეკატერინე ტიკარაძემ.
ჯანდაცვის მინისტრმა იმედი გამოთქვა, რომ მასობრივი ვაქცინაციის დაანონსების შემდეგ, მოქალაქეები უფრო მეტ აქტიურობას გამოიჩენენ და აიცრებიან.
ტიკარაძის თქმით, ამ ეტაპისთვის ვაქცინაციის პროცესში ჩართულია 200 კლინიკა, 281 ამცრელი ბრიგადა, თითო ბრიგადის გამტარიანობა არის 60 პაციენტი 8 საათიანი სამუშაო გრაფიკში.
"არსებული რესურსებით არის შესაძლებლობა, რომ დღიურ რეჟიმში 17 ათასი ადამიანი აიცრას, რაც 25 დღიანი სამუშაო პერიოდში იქნება ნახევარი მილიონი ვაქცინირებული მოქალაქე", - დასძინა მინისტრმა.
