ჩეხეთის ხელისუფლების გადაწყვეტილებით, პრაღაში ბელარუსის ოპოზიციის ოფიციალური წარმომადგენლობა გაიხსნება.
ამ გადაწყვეტილების მიღებას წინ უსწრებდა პრაღაში ბელარუსის ოპოზიციის ლიდერის, სვიატლანა ციხანოუსკაიას ვიზიტი.
ჩეხეთის საგარეო საქმეთა მინისტრმა, იაკუბ კულჰანეკმა განაცხადა, რომ ჩეხეთის ხელისუფლება შეთანხმდა ბელარუსის ოპოზიციის წარმომადგენლობის პრაღაში გახსნაზე, ლიეტუვის მოდელის მიხედვით.
ბელარუსის ოპოზიციას ასეთი წარმომადგენლობები უკვე აქვს ლიეტუვასა და პოლონეთში.
კულჰანეკის თქმით, ჩეხეთი განაგრძობს ბელარუსი ხალხისა და ოპოზიციის მტკიცე, განუხრელ და ერთსულოვან მხარდაჭერას.
პრეზიდენტობის ყოფილი კანდიდატი, ბელარუსის ოპოზიციის ლიდერი სვიატლანა ციხანოუსკაია გასული წლის საპრეზიდენტო არჩევნების შემდეგ იძულებული გახდა ქვეყანა დაეტოვებინა. იგი აქტიურად უჭერს მხარს ბელარუსში მიმდინარე საპროტესტო მოძრაობას და ლუკაშენკას რეჟიმზე ზეწოლის გასაძლიერებლად შეხვედრებს მართავს დასავლეთს ქვეყნების ლიდერებთან.
ალიაქსანდრ ლუკაშენკას საპრეზიდენტო არჩევნებში გამარჯვებულად გამოცხადების შემდეგ, ბელარუსში დაწყებული მასობრივი საპროტესტო აქციების შედეგად, ათასობით ადამიანი დაშავდა, დააპატიმრეს და დააკავეს, მათ შორის ათობით ჟურნალისტი.
