შეერთებულ შტატებს რუსეთთან სტაბილური და პროდუქტიული ურთიერთობები სურს, მაგრამ თუ მოსკოვი განაგრძობს "თავდასხმებს", ვაშინგტონი მათ სათანადოდ უპასუხებს. ამის შესახებ შეერთებული შტატების სახელმწიფო მდივანმა, ენტონი ბლინკენმა იტალიურ გაზეთ La Repubblica-სთან ინტერვიუში განაცხადა.
"თუ რუსეთი განაგრძობს ჩვენზე თავდასხას ან მოიქცევა ისე, როგორც მოიქცა SolarWind-ზე კიბერშეტევის, არჩევნებში ჩარევის, ან ნავალისთან მიმართებაში, მაშინ ჩვენ ვუპასუხებთ", - თქვა ბლინკენმა.
ამ თვის დასაწყისში, ჟენევაში სამიტის დროს, აშშ-ს პრეზიდენტმა ჯო ბაიდენმა უთხრა რუსეთის პრეზიდენტს ვლადიმირ პუტინს, რომ კიბერშეტევები გარკვეულ კრიტიკულ ინფრასტრუქტურულ ობიექტებზე უნდა გამოირიცხოს.
ჩინეთის საკითხზე საუბრისას, ბლინკენმა ხაზი გაუსვა ამ კუთხით პრობლემის სიმწვავეს და დასძინა, რომ შეერთებული შტატები პატივს სცემს იმ ფაქტს, რომ სხვადასხვა ქვეყნებს პეკინთან განსხვავებული ურთიერთობა აქვთ.
სახელმწიფო მდივნის თქმით, შეერთებული შტატები არავის შესთავაზებს არჩევანის გაკეთებას მასსა და ჩინეთს შორის.
"მიუხედავად ამისა, არ აქვს მნიშვნელობა როგორ ვითანამშრომლებთ ჩინეთთან - როგორც მოწინააღმდეგე, როგორც კონკურენტი ან როგორც პარტნიორი - ჩვენი ქმედებები უფრო ეფექტური იქნება, თუ ვიმოქმედებთ შეთანხმებულად", - თქვა ბლინკენმა.
