სოციალური მედიის ამერიკული გიგანტი Facebook-ი ყველაზე "ახალგაზრდა" კომპანია გახდა, რომლის საბაზრო კაპიტალიზაციამ 1 ტრილიონ დოლარს გადააჭარბა.

Bloomberg-ის მონაცემებით, Facebook-ს კაპიტალიზაცია 1.008 ტრილიონ დოლარს შეადგენს.

Facebook-ის საბაზრო ფასის ზრდა დაკავშირებულია სასამართლო პროცესის მოგებასთან. ფედერალურმა სასამართლომ უარყო Facebook-ის წინააღმდეგ ამერიკის ფედერალური სავაჭრო კომისიისა და შტატების კოალიციის სარჩელი. მოსარჩელეები თვლიდნენ, რომ Facebook-ის მიერ WhatsApp-ისა და Instagram-ის შეძენამ ბაზარზე კონკურენტების მდგომარეობა უსამართლოდ შეავიწროვა და Facebook-მა მონოპოლია მოიპოვა.

სასამართლოს გადაწყვეტილებით, მოსარჩელეებმა სათანადოდ ვერ დაასაბუთეს თავიანთი საჩივარი, რადგან მასში არაფერია ნათქვამი, თუ სინამდვილეში რამდენად ჰქონდა Facebook-ს იმის შესაძლებლობა ბაზარზე მონოპოლიის მოპოვებისა.

სასამართლოს გადაწყვეტილების შემდეგ, Facebook-ის აქციის ფასმა, თითო აქციაზე, 355,64 დოლარს მიაღწია. იმავდროულად, კომპანიის პოპულარულობა წელს აპლიკაციების წყალობით 30%-ით გაიზარდა. ამან კი კომპანიის მომხმარებელთა სტაბილური ზრდა და ციფრულ რეკლამაზე დიდი მოთხოვნა გამოიწვია.

საბაზრო კაპიტალიზაციის 1-ტრილიონდოლარიანი ბარიერი მანამდე Amazon-მა, Alphabet-მა (Google), Microsoft-მა და Apple-მა გადალახეს.