ჩეხეთის ხელისუფლება 2014 წელს ვრბეტიცეში, სამხედრო საწყობში მომხდარი აფეთქების გამო, რუსეთისგან 25.5 მილიონი ევროს ოდენობის კომპენსაციას მოითხოვს.
როგორც ადგილობრივი მედია იუწყება, ჩეხეთის საგარეო საქმეთა სამინისტროში გამოიძახეს რუსეთის ელჩი ალექსანდ ზმეევსკი და გადასცეს პრაღის საპროტესტო ნოტა.
ჩეხეთის რესპუბლიკამ აფეთქებების შედეგად მიყენებული ზარალი შეაფასა დაახლოებით 650 მილიონ ჩეხურ კრონად (25,5 მილიონი ევრო).
გარდა ამისა, პრაღამ რუსეთის ელჩთან მკაცრად გააპროტესტა კრემლის გადაწყვეტილება, ჩეხეთის არამეგობრულად განწყობილ ქვეყანათა ნუსხაში შეტანის შესახებ.
ჩეხეთის საგარეო საქმეთა სამინისტროს განმარტებით, ეს გადაწყვეტილება ეწინააღმდეგება დიპლომატიური ურთიერთობების შესახებ 1961 წლის ვენის კონვენციას და ჩეხეთსა და რუსეთს შორის მეგობრული ურთიერთობებისა და თანამშრომლობის შესახებ 1993 წლის შეთანხმებას.
ჩეხეთის საგარეო საქმეთა სამინისტროს განცხადებას გამოეხმაურა რუსეთის საგარეო საქმეთა სამინისტროს ოფიციალური წარმომადგენელი მარია ზახაროვა, რომელმაც აღნიშნა, რომ ჩეხეთი ყოველი ახალი განცხადებით ადასტურებს თავის სტატუსს, როგორც რუსეთისთვის არამეგობრული ქვეყანა. კომპენსაციის მოთხოვნას კი ზახაროვამ გამოძალვა უწოდა.
მანამდე ჩეხეთმა სამხედრო საწყობის აფეთქების ორგანიზებასა და განხორციელებაში, რომელსაც ორი ადამიანი ემსხვერპლა, რუსეთის სპეცსამსახურები დაადანაშაულა, რამაც პრაღასა და კრემლს შორის ურთიერთობების გამწვავება გამოიწვია. ორ ქვეყანას შორის დაძაბულობა ერთმანეთის დიპლომატების გაძევებით კიდევ უფრო გაღრმავდა.
რუსეთი კატეგორიულად უარყოფს აფეთქებაში რაიმე სახით მონაწილეობას.
