ბელარუსმა ევროკავშირის "აღმოსავლეთ პარტნიორობის" ინიციატივაში მონაწილეობა შეაჩერა. განაცხადა ბელარუსის საგარეო საქმეთა სამინისტროს პრესსამსახურმა.
"ბელარუსის რესპუბლიკა აჩერებს მონაწილეობას ევროკავშირის აღმოსავლეთ პარტნიორობის ინიციატივაში. ბელარუსი იწყებს ევროკავშირთან რეადმისიის ხელშეკრულების შეჩერების პროცედურას. ჩვენ ვერ შევასრულებთ ამ ხელშეკრულებით ნაკისრ ვალდებულებებს ევროკავშირის მიერ დაწესებული სანქციებისა და შეზღუდვების პირობებში“, - ნათქვამია განცხადებაში.
ბელარუსის საგარეო უწყებაში აღნიშნეს, რომ ევროკავშირის მიერ ბელარუსის წინააღმდეგ დაწესებული უპრეცედენტო სანქციების გამო, ბელარუსში ევროკავშირის ელჩი, დირკ შუბელი საგარეო უწყებაში დაიბარეს.
ბელარუსის საგარეო საქმეთა სამინისტროს განცხადებით, ევროკავშირის ელჩთან შეხვედრაზე, ხაზგასმით იქნა აღნიშნული, რომ ევროკავშირის მიერ დაწესებული სანქციები აბსოლუტურად მიუღებელია და იგი სუვერენულ და დამოუკიდებელ სახელმწიფოზე ზეწოლის ინსტრუმენტად გამოიყენება.
