ჩრდილოეთ კორეის მოსახლეობა მათი ლიდერის, კიმ ჩენ ინის წონაში მკვეთრად დაკლების გამო, დამწუხრებულია. ამის შესახებ განაცხადა ფხენიანის ერთ-ერთმა მკვიდრმა სახელმწიფოს მიერ კონტროლირებად მედიასთან საუბრისას.
ავტოკრატი ლიდერის ჯანმრთელობასთან დაკავშირებული საჯარო კომენტარი მას შემდეგ გაკეთდა, რაც ანალიტიკოსებმა აღნიშნეს, რომ კიმ ჩენ ინი, რომელიც სავარაუდოდ 37 წლისა უნდა იყოს, წონაში აშკარად დაკლებულია.
"პატივცემული გენერალური მდივნის (კიმ ჩენ ინი) ხილვა ასეთ მდგომარეობაში, ჩვენს ხალხს გულს უკლავს", - განაცხადა ფხენიანის მკვიდრმა სახელმწიფო მაუწყებლის KRT-ს ეთერში.
"ყველა ამბობს, რომ ცრემლები სდით", - დასძინა მან.
სახელმწიფო მაუწყებელმა ასევე გაავრცელა ვიდეოკლიპი, სადაც ფხენიანის მოსახლეობა ქუჩაში განთავსებულ ეკრანზე კონცერტს უყურებს, რომელსაც კიმ ჩენ ინი დაესწრო.
მედია კიმ ჩენ ინის წონაში კლების მიზეზებზე არ საუბრობს.
გასული წლის დასაწყისში, კიმ ჩენ ინის ჯანმრთელობის შესახებ სპეკულაციები გავრცელდა მას შემდეგ, რაც 15 აპრილს სახელმწიფოს დამფუძნებლის, კიმ ირ სენის დაბადების წლისთავს არ დაესწრო და მხოლოდ მაისის დასაწყისში გამოჩნდა საზოგადოებაში.
