ბრიტანეთში, ლონდონის მახლობლად, კენტის საგრაფოში, ავტობუსის გაჩერებასთან გამვლელმა შემთხვევით იპოვა ბრიტანეთის თავდაცვის სამინისტროს გასაიდუმლოებული დოკუმენტები, რომელიც შეიცავს ინფორმაციას ბრიტანეთის სამხედრო-საზღვაო ძალების გამანადგურებლის, HMS Defender-ის შავ ზღვაში გადაადგილების შესახებ.

დაახლოებით 50-გვერდიანი დოკუმენტი მპოვნელმა BBC-ის რედაქციას მიაწოდა, როდესაც მიხვდა, რომ საიდუმლო ინფორმაციას ფლობდა.

დოკუმენტის მნიშვნელოვანი ნაწილი ეხება Defender-ის შავ ზღვაში, ყირიმის მახლობლად, საერთაშორისო სამართლის მიხედვით, უკრაინის ტერიტორიულ წყლებში გადაადგილებას.

დოკუმენტში ასევე მიმოხილულია რუსეთის შესაძლო რეაქციები Defender-ის ყირიმის მახლობლად გადაადგილებაზე. ბრიტანეთის თავდაცვის სამინისტრო განიხილავდა რუსეთის საპასუხო ქმედებების 3 ვარიანტს - დაწყებული "უსაფრთხო და პროფესიონალურიდან", დამთავრებული "არაუსაფრთხო და არაპროფესიონალურით".

როგორც დოკუმენტიდან ირკვევა, ბრიტანეთის თავდაცვის დეპარტამენტს სახმედრო ხომალდის მარშრუტის ორი ვარიანტი ჰქონდა მომზადებული. ერთ-ერთი ვარიანტით, ხომალდს ყირიმისგან მოშორებით უნდა გაევლო, რაც რუსეთის მხრიდან პრეტენზიებს არ გამოიწვევდა. თუმცა, ლონდონი აღნიშნავდა, რომ ამ ვარიანტით ყველაფერი ისე გამოიყურებოდა, თითქოს ბრიტანეთის საზღვაო ფლოტს "შეეშინდა და გაიქცა".

როგორც BBC News აღნიშნავს, დოკუმენტები ადასტურებენ, რომ ხომალდის ყირიმის მახლობლად გავლა, რომელსაც ლონდონი უკრაინის ნაწილად მიიჩნევს, "ბრიტანეთის მთავრობის გააზრებული გადაწყვეტილება იყო, რითაც შესაძლო რისკების მიუხედავად, სურდა კიევისთვის მტკიცე მხარდაჭერა გამოეხატა".

ბრიტანეთის თავდაცვის სამინისტრომ დაადასტურა, რომ რამდენიმე დღის წინ, ერთ-ერთმა ოფიცერმა საიდუმლო დოკუმენტების დაკარგვის შესახებ განაცხადა.

23 ივნისს რუსეთის თავდაცვის სამინისტრომ განაცხადა, რომ ბრიტანეთის საზღვაო ძალების გამანადგურებელმა ხომალდმა Defender-მა, რომელიც ოდესის პორტიდან ბათუმისკენ მიემართებოდა, რუსეთის "სახელმწიფო საზღვარი" დაარღვია და ყირიმთან "რუსეთის ტერიტორიულ წყლებში" შევიდა, რის შემდეგაც რუსეთის შეიარაღებულმა ძალებმა მას გამაფრთხილებელი ცეცხლი გაუხსნა. ბრიტანეთმა რუსეთის თავდაცვის უწყების მიერ გავრცელებული ინფორმაცია უარყო.

მეორე დღეს, დიდი ბრიტანეთის თავდაცვის უწყებამ განაცხადა, რომ ბრიტანეთის სამხედრო ხომალდ Defender-ს, რუსეთისთვის შეტყობინების გარეშე უკრაინის ტერიტორიულ წყლებში მშვიდობიანად შესვლის უფლება ჰქონდა, რაც გააკეთა კიდეც.

იმავე დღეს, რუსეთში ბრიტანეთის ელჩი რუსეთის საგარეო საქმეთა სამინისტროში დაიბარეს მკაცრი პროტესტის გადასაცემად.

სახმედო ხომალდი HMS Defenderi-ი ამჟამად ბათუმის პორტში იმყოფება. საქართველოს ტერიტორიულ წყლებში იგი 26 ივნისს შემოვიდა. ხომალდის ვიზიტი მიზნად ისახავს თავდაცვისა და უსაფრთხოების სფეროში გაერთიანებულ სამეფოსა და საქართველოს შორის არსებული მჭიდრო თანამშრომლობის დემონსტრირებას.