ბრიტანეთს ჯანდაცვის მინისტრმა, მეთ ჰენკოკმა თანამდებობა დატოვა მას შემდეგ, რაც გავრცელდა ფოტო, სადაც ასახულია მინისტრისა და მისი თანამშრომლის კოცნა.

ცოტა ხნით ადრე, გამოცემა The Sun-მა გამოაქვეყნა ფოტო, სადაც მეთ ჰენკოკი თავის თანამშრომელს ჯინა კოლადანჯელოს კოცნის. გამოცემის ინფორმაციით, ფოტო მაშინ არის გადაღებული, როდესაც ბრიტანეთში სოციალური დისტანცირების მკაცრი წესები მოქმედებდა.

თანამდებობა ასევე დატოვა ჯინა კოლადანჯელომ, რომელიც ჯანდაცვის დეპარტამენტში ერთ-ერთ წამყვან პოზიციას იკავებდა.

აღსანიშნავია, რომ ჰენკოკი და კოლადანჯელო ორივენი დაოჯახებულები არიან.

გადადგომის წერილში, ჰენკოკმა ბოდიში მოუხადა საზოგადოებას სოციალური დისტაცირების წესების დარღვევისთვის. მან ასევე მოუბოდიშა ოჯახის წევრებს, რომ ასეთი უხერხული ინცინდენტის მონაწილენი გახდნენ.

როგორც იუწყებიან, პრემიერ-მინისტრმა ჯონსონმა ჰენკოკის გადადგომის წერილი მწუხარებით მიიღო და განაცხადა, რომ ჯანდაცვის მინისტრმა გაწეული სამუშაოს გამო, როგორც პანდემიის დროს, ასევე პანდემიამდე, ამაყად უნდა დატოვოს სამინისტრო.