კორონავირუსის დელტა ვარიანტი, რომლის იდენტიფიცირება პირველად ინდოეთში მოახდინეს, ორჯერ უფრო გადამდებია ვიდრე, კორონავირუსის თავდაპირველი, ჩინეთის ქალაქ უხანში აღმოჩენილი ვარიანტი.
ამის შესახებ ჯანმრთელობის მსოფლიო ორგანიზაციის მთავარმა მეცნიერმა, სუმია სვამინატანმა განაცხადა.
სვამინატანის განცხადებით, მისი გავრცელების სიჩქარის გათვალისწინებით, დელტა ვარიანტი შეიძლება გახდეს კორონავირუსის დომინანტი სახეობა მსოფლიოში.
"კარგი ამბავია ის, რომ დღეს მსოფლიოში გამოყენებული ვაქცინების უმეტესობა ეფექტურია, თუნდაც მძიმე დაავადების თავიდან ასაცილებლად", - თქვა სვიმინატანმა.
მარტის ბოლოს ინდოეთში აღმოაჩინეს კორონავირუსის ორმაგი მუტაციის ახალი ვარიანტი, ცნობილი როგორც B.1.617. ეს ვარიანტი უფრო გადამდებია, ვიდრე SARS-CoV-2, რომელიც პირველად გასულ წელს ჩინეთის ქალაქ უხანში გამოვლინდა.
მანამდე ცნობილი გახდა კორონავირუსის "ბრიტანული" და "ბრაზილიური" ვარიანტების შესახებ, რომლებიც ასევე მაღალი გადამდებობით ხასიათდებიან, ვიდრე თავდაპირველი ვარიანტი.
ჯანმრთელობის მსოფლიო ორგანიზაციამ, სტიგმატიზაციის თავიდან ასაცილებლად, კორონავირუსის შტამები ბერძნული ანბანის ასოებით დაასათაურა.
კორონავირუსის „ბრიტანულ ვარიანტს“ ეწოდა ალფა, „სამხრეთაფრიკულს“ - ბეტა, „ბრაზილიურს“ - გამა და „ინდურს“ - დელტა.
მანამდე, ინდოეთის მთავრობამ უკმაყოფილება გამოხატა იმის გამო, რომ მათ ქვეყანაში აღმოჩენილ შტამს ინდურს უწოდებდნენ.
