შეერთებულ შტატებში ახალი ფედერალური დღესასწაული დაწესდა - მონობის გაუქმების დღე, რომელიც ამიერიდან ყოველი წლის 19 ივნისს აღინიშნება.
ხუთშაბათს, 18 ივნისს, პრეზიდენტმა ჯო ბაიდენმა და ვიცე-პრეზიდენტმა კამალა ჰარისმა ხელი მოაწერეს განკარგულებას, რომლითაც 19 ივნისი ფედერალურ დონეზე აღინიშნება.
მანამდე, შესაბამისი კანონპროექტი შეერთებული შტატების კონგრესში ორპარტიული მხარდაჭერით მიიღეს.
კონგრესის წარმომადგენელთა პალატამ კანონპროექტი 415 ხმით 14-ის წინააღმდეგ დაამტკიცა, სენატის მიერ მისი ერთხმად დამტკიცებიდან ერთი დღის შემდეგ.
ხელმოწერის ცერემონიაზე, ჯო ბაიდენის განცხადებით, მოხარულია, რომ დემოკრატები და რესპუბლიკელები გაერთიანდნენ იმ იდეის ირგვლივ, რომ ერთსულოვნად მიეგოთ პატივი ამ მნიშნველოვანი დღისთვის.
"დიდებული ერები არ უგულვებელყოფენ თავიანთი ისტორიის ყველაზე მტკივნეულ მომენტებს, ისინი სწავლობენ ამ გაკვეთილებისგან", - თქვა ჯო ბაიდენმა
ცერემონიაზე, რომელსაც კონგრესის წევრები, აფორამერიკული საზოგადოების ლიდერები და 94 წლის შავკანიანი აქტივისტი ოპალი ლი ესწრებოდნენ. ოპალი ლი ათწლეულების განმავლობაში იბრძოდა 19 ივნისის ფედერალურ დღესასწაულად გამოცხადებისთვის.
შეერთებულ შტატებში მონობის გაუქმების ოფიციალური დღედ 1865 წლის 19 ივნისი ითვლება. ამ დღეს, სამოქალაქო ომის დასრულებიდან ორი თვის შემდეგ (1861-1865), ხელმოწერილი ემანსიპაციის პროკლამაცია წაიკითხეს სამხრეთ კონფედერაციის უკანასკნელ ნაწილში - ტეხასში.
ემანსიპაციის პროკლამაცია სამოქალაქო ომის შუა ხანებში, 1863 წლის 1 იანვარს, გამოსცა პრეზიდენტმა აბრაამ ლინკოლნმა, მაგრამ იგი ძალაში იმთავითვე არ შესულა სამხრეთ შტატების წინააღმდეგობის გამო.
