რეგიონული პოლიტიკისა და თვითმმართველობის კომიტეტმა თემატური მოკვლევის ჯგუფი შექმნა, რომელიც იმუშავებს თემაზე: „მუნიციპალიტეტების საქმიანობაში მოქალაქეთა ჩართულობა“.
თემატური მოკვლევა, რომელიც საპარლამენტო კონტროლის განხორციელების ერთ-ერთი მნიშვნელოვანი მექანიზმია, მიზნად ისახავს შეისწავლოს ადგილობრივი თვითმმართველობის განხორციელებაში მოქალაქეთა ჩართულობის მდგომარეობა, რომელიც უზრუნველყოფილია თვითმმართველობის კოდექსით და გამოავლინოს ის პრობლემები და ხარვეზები, რომელიც ხელს უშლის მოქალაქეებს, აქტიურად და ეფექტიანად ჩაერთონ მუნიციპალიტეტების საქმიანობაში.
თემატურ მოკვლევაში მონაწილეობა შეუძლია ყველა დაინტერესებულ მხარეს, მათ შორის, შესაბამის სამინისტროებს, სამთავრობო უწყებებს, ადგილობრივი თვითმმართველობის საკითხებზე მომუშავე არასამთავრობო ორგანიზაციებს, ექსპერტებს, აქტიურ მოქალაქეებს და სამოქალაქო საზოგადოების სხვა წარმომადგენლებს, რათა უზრუნველყოფილი იყოს პროცესის ინკლუზიურობა და მაქსიმალურად მოხდეს, ყველა მხარის პოზიციისა და გამოცდილების გაზიარება.
მოკვლევის შედეგად მიღებული დასკვნებისა და წინადადებების საფუძველზე შემუშავდება რეკომენდაციები და საჭიროების შემთხვევაში, საკანონმდებლო ცვლილებები, რომელიც ხელს შეუწყობს უკეთესი, მოქალაქეზე ორიენტირებული ევროპული ტიპის თვითმმართველობის განვითარებას და მონაწილეობით დემოკრატიის გაძლიერებას.
თემატური მოკვლევის ჯგუფში მონაწილეობას მიიღებენ კომიტეტის თავმჯდომარე სოზარ სუბარი, კომიტეტის თავმჯდომარის მოადგილე ეკა სეფაშვილი და კომიტეტის წევრები: ანზორ ბოლქვაძე, ედიშერ თოლორაია, ვიქტორ ჯაფარიძე, ზაურ დარგალი, გიორგი ხოჯევანიშვილი, გიორგი ვაშაძე და ნინო ლაცაბიძე.
ჯგუფის მთავარ მომხსენებლად ეკა სეფაშვილი დასახელდა.
