ისრაელის საკანონმდებლო ორგანოში, ქნესეთში დღეს კენჭს უყრიან ახალი სამთავრობო კოალიციისთვის ნდობის გამოცხადების საკითხს, მოქმედი პრემიერ-მინისტრის, ბენიამინ ნეთანიაჰუს მონაწილეობის გარეშე.
იმ შემთხვევაში, თუ ახალი კოალიცია, რომელიც 8 პარტიის წარმომადგენლებისგან არის დაკომპლექტებული, შეძლებს ნდობის მოპოვებას, ნეთანიაჰუს მამრთველობის 12-წლიანი პერიოდი დასრულდება.
აღსანიშნავია, რომ ქნესეთში ახალ კოალიციას მინიმალური უმრავლესობა აქვს.
3 ივნისს, ცენტრისტული პარტიის "იეშ ატიდის" ლიდერმა, იაირ ლაპიდმა განაცხადა, რომ ოპოზიციურმა პარტიებმა სამთავრობო კოალიციის ფორმირების შესახებ შეთანხმებას მიაღწიეს.
როტაციის შეთანხმების თანახმად, ნდობის გამოცხადების შემთხვევაში, ისრაელის ახალ მთავრობას მემარჯვენე პარტიის "იამინას" ლიდერი ნაფტალი ბენეტი პირველი ორი წლის განმავლობაში უხელმძღვანელებს, მომდევნო ორი წელი კი პრემიერ-მინისტრი იაირ ლაპიდი იქნება.
ნდობის გამოცხადების საკითხის კენჭსყრაზე ჩავარდნის შემთხვაში, არსებობს რისკი, რომ ისრაელში ბოლო ორი წლის განმავლობაში მე-5 არჩევნები ჩატარდეს.
