ევროკავშირის ელჩებმა დაამტკიცეს გეგმა, რომლითაც ბლოკის საჰაერო სივრცე დაიხურება ბელარუსის ავიაკომპანიებისთვის. ინფორმაციას დიპლომატიურ წყაროზე დაყრდნობით Reuters-ი ავრცელებს.
გარდა ამისა, ბელარუსის ავიაკომპანიებს აეკრძალებათ ევროპის აეროპორტებში დაშვება.
ევროკავშირის ეს გადაწყვეტილება ნაწილი იმ სადამსჯელო ღონისძიებებისა, რომელიც მინსკის წინააღმდეგ მზადდება, Rynair-ის თვითმფრინავის იძულებით დაშვებისა და ჟურნალისტ რომან პრატასევიჩის დაკავების გამო.
ავიარეისების აკრძალვის გადაწყვეტილება ცენტრალური ევროპის დროით, შუაღამისას შევა ძალაში.
ამასთან, ევროკავშირი დაჟინებით მოუწოდებს ევროკავშირის წევრი ქვეყნების ავიაკომპანიებს, თავი აარიდონ ბელარუსის საჰაერო სივრცეში ფრენას.
მანამდე, ევროკავშირის საავიაციო უსაფრთხოების სააგენტომ გამოსცა დირექტივა, რომლის მიხედვითაც ევროკავშირის ავიაკომპიებმა, გარდა საგანგებო ვითარებისა, არ უნდა გამოიყენონ ბელარუსის საჰაერო.
ბელარუსის ეროვნული გადამზიდავი Belavia აწარმოებს ფრენებს, რომელიც ბელარუსს ევროპის 20 აეროპორტთან აკავშირებს, მათ შორის, ჰელსინკის, ამსტერდამის, მილანის, ვარშავის, ფრანკფურტის, ბერლინის, მიუნხენის, პარიზის, რომისა და ვენის აეროპორტებთან.
ავიარეისების აკრძალვის გადაწყვეტილების აღსრულება ეროვნულ მთავრობებს დაევალებათ.
