ბელარუსის ხელისუფლება ამცირებს ამერიკის შეერთებული შტატების დიპლომატიური მისიის დიპლომატიურ და ადმინისტრაციულ-ტექნიკურ თანამშრომელთა რაოდენობას. ამის შესახებ ბელარუსის საგარეო საქმეთა სამინისტროს პრესმდივანმა განაცხადა.
"დღეს ბელარუსში აშშ-ის საქმეთა დროებითი რწმუნებული გამოიძახეს საგარეო საქმეთა სამინისტროში და გააცნეს საპასუხო ზომები. ესენია: დიპლომატიური და ადმინისტრაციულ-ტექნიკური პერსონალის რაოდენობის შემცირება, სავიზო პროცედურების გამკაცრება და შეზღუდვა", - ნათქვამია პრესმდივნის განცხადებაში.
ამასთან, მინსკი დროებით შეზღუდავს ამერიკელი სპეციალისტების მუშაობას ბელარუსში.
გარდა ამისა, მინსკი აუქმებს ბელარუსში USAID-ის მუშაობის მანდატს.
საგარეო საქმეთა სამინისტროს პრესმდივნის განცხადებით, მინსკს არ სურს ვაშინგტონთან ურთიერთობების ესკალაცია და თანასწორობის პრინციპებზე დაყრდნობით თანამშრომლობის მზადყოფნას გამოთქვამს.
გასულ კვირას, შეერთებულმა შტატებმა ბელარუსის წინააღმდეგ სანქციები დააწესა.
