გერმანიამ რუსული ავიაკომპანიების რეისების მიღება შეაჩერა. განაცხადა ოთხშაბათს გერმანიის ტრანსპორტის ფედერალურმა სამინისტრომ.
ტრანსპორტის სამინისტროს ამ გადაწყვეტილებას წინ უსწრებდა გერმანული ავიაგადამზიდავის Lufthansa-სთან დაკავშირებული ინციდენტი, რომელსაც რეისების გაუქმება მოუწია, რადგან მოსკოვისგან დროულად ვერ მიიღო ნებართვა ფრენის განხორციელებისთვის.
"საპასუხო პრაქტიკიდან გამომდინარე, ფედერალურმა საავიაციო უწყებამ ასევე არ გასცა ნებართვები რუსული ავიაკომპანიების ფრენებზე", - იტყობინება ტრანსპორტის სამინისტრო.
მათივე ცნობით, როგორც კი რუსეთის ფედერალური საავიაციო სააგენტო Lufthansa-ს ფრენებზე ნებართვას გასცემს, რუსული ავიაკომპანიების რეისები ნებადართული იქნება.
გერმანიის ტრანსპორტის სამინისტროს გადაწყვეტილების გამო, 1-ელ ივნისს რუსული ავიაკომპანია "აეროფლოტის" 3 რეისი გაუქმდა, 2 ივნისს კი - 4 რეისი.
