ევროკომისიის პრეზიდენტმა ურსულა ფონ დერ ლაიენმა განაცხადა, რომ ამერიკის მოქალაქეებს, რომლებიც სრულად არიან აცრილნი კორონავირუსის საწინააღმდეგო ვაქცინით, ზაფხულში უნდა შეეძლოთ ევროკავშირში მოგზაურობა.
"ამერიკელები, რამდენადაც ვხედავ, იყენებენ ევროპის მედიკამენტების სააგენტოს მიერ დამტკიცებულ ვაქცინებს", - განუცხადა ფონ დერ ლაიენმა New York Times- ს კვირას და დასძინა, "ეს მათ თავისუფალი გადაადგილებისა და ევროკავშირში მოგზაურობის საშუალებას მისცემს".
ყველა ვაქცინა, რომელსაც ამჟამად აშშ-ში იყენებენ - Moderna, Pfizer/BioNTech და Johnson & Johnson, ასევე დამტკიცებულია ევროკავშირის მარეგულირებლის მიერ, რომელიც ფონ დერ ლეიენის თქმით, ბლოკს საშუალებას მისცემს გახსნას კარი ამერიკელი ტურისტებისთვის მას შემდეგ, რაც ევროპულმა ქვეყნებმა ერთი წლის წინ, პანდემიის გამო, აშშ-დან მოგზაურობა შეზღუდეს.
ევროკომისიის პრეზიდენტის განცხადებით, დაწესებულ შეზღუდვებში ცვლილებების შეტანა დამოკიდებული იქნება ეპიდემიოლოგიურ ვითარებაზე.
"ვხედავთ, შეერთებულ შტატებში მდგომარეობა უმჯობესდება, იმედია, ასევე გაუმჯობესდება ევროკავშირშიც", - დასძინა ურსულა ფონ დერ ლაიენმა.
ევროკავშირის ერთანი პოზიციის მიუხედავად, ცალკეულ ქვეყნებს კვლავ აქვთ შესაძლებლობა, ინდივიდუალურად გადაწყვიტონ, თუ რომელი ქვეყნის მოქალაქეთათვის გახსნიან საზღვრებს. მაგალითისთვის, საბერძნეთმა უკვე დართო ქვეყანაში შესვლის ნება ამერიკელ ტურისტებს, რომლებიც უარყოფით კოვიდტესტს ან სრული ვაქცინაციის დამადასტურებელ ცნობას წარადგენენ.
ურსულა ფონ დერ ლაიენს არ დაუკონკრეტებია, როდიდან აღდგება ფრენები შეერთებული შტატებიდან.
