ნინოწმინდა-წალკის საავტომობილო გზა ექსპლოატაციაში ნოემბრის ბოლოდან შევა.
როგორც პრეზიდენტის პრესპიკერმა მანანა მანჯგალაძემ დღეს გამართულ ყოველკვირეულ ბრიფინგზე განაცხადა, შესაბამისი სამუშაოები რამდენიმე დღეში დასრულდება.
"ნოემბრის თვეში რამდენიმე პროექტის განხორციელება დასრულდება, მათ შორის ექსპლუატაციაში შევა სამცხე-ჯავახეთის გზის 223 კილომეტრიანი გზატკეცილი, რომელიც ნინოწმინდა-წალკის მონაკვეთს მოიცავს... პროექტის ფარგლებში 15-მდე პატარა ხიდის მშენებლობაც მოხდა", - განმარტა მანჯგალაძემ.
აღსანიშნავია, რომ ნინოწმინდა-წალკის გზის რეაბილიტაცია "მილენიუმის" პროექტის ფარგლებში განხორციელდა და მისი შეკეთება 203 მლნ აშშ დოლარი დაჯდა.
შესაბამისი სამუშაოები 2008 წლის გაზაფხულზე დაიწყო. გზის მშენებლობაზე 2 300-ზე მეტი ადამიანი იყო დასაქმებული.