ქართულ ოცნებას უნდა ესმოდეს, რომ ვერავის იყიდის ახლა და ვერავის ვერ შეიტყუებს პარლამენტში, რადგან ელისაშვილის გზის განმეორება არამგონია ვინმე ჭკუათმყოფელს უნდოდეს. ამის შესახებ "ერთიანი საქართველოს" ლიდერმა, ნინო ბურჯანაძემ ოპოზიციური პარტიების ლიდერების შეხვედრის შემდეგ განაცხადა.
ნინო ბურჯანაძის განცხადებით, შეხვედრაზე ზურაბ ჯაფარიძემ წამოაყენა ინიციატივა, რომ პარლამენტს ხელმეორედ მიმართონ მანდატების შეწყვეტის მოთხოვნით, ვინაიდან ყველა ეჭვი გაიფანტოს იმასთან დაკავშირებით, თითქოს ოპოზიცია პარლამენტში შევა პოლიტპატიმრების გათავისუფლებისა და ვადამდელი არჩევნების დანიშვნის გარეშე.
"ეს იმ ადამიანების გადასაწყვეტია, ვისაც აქვს კონკრეტული მანდატები. მე არც საწინააღმდეგო მაქვს ამისი რამე და არც ამის აუცილებლობას არ ვხედავ, რადგან ერთხელ უკვე ამ ადამიანებს მანდატებზე უარი ნათქვამი აქვთ, წესით და რიგით ეს სრულიად საკმარისია, მაგრამ გარკვეული სიმბოლური მნიშვნელობა რა თქმა უნდა, ექნება იმას, რაც ზურამ თქვა. ქართულ ოცნებას უნდა ესმოდეს, რომ ვერავის იყიდის ახლა და ვერავის ვერ შეიტყუებს პარლამენტში, რადგან ელისაშვილის გზის განმეორება არამგონია ვინმე ჭკუათმყოფელს უნდოდეს. დიალოგს მხოლოდ იმ შემთხვევაში ექნება აზრი, თუ „ქართული ოცნება“ კონკრეტულ რაიმე სიახლეზე წამოვა პოლიტპატიმრებთან დაკავშირებით და ვადამდელ არჩევნებთან დაკავშირებით", - განაცხადა ნინო ბურჯანაძემ.
