ეს ყველაფერი არის ფსევდოპატრიოტიზმით შეფუთული სამარცხვინო ისტერია. ნაცაქტივისტებს, არც პოზნერი ადარდებთ, არც აფხაზეთი და არც სამაჩაბლო. ამის ფრაქცია "ქართული ოცნების" თავმჯდომარე მამუკა მდინარაძემ ბრიფინგზე განაცხადა.
მისი თქმით, ჟურნალისტი ვლადიმერ პოზნერი საქართველოში ტურისტული ვიზიტით იყო ჩამოსული და მას არ ჰქონდა დარღვეული ოკუპაციის შესახებ კანონი.
"საზოგადოებამ უნდა იცოდეს, რომ ჟურნალისტი ვლადიმერ პოზნერი საქართველოში ტურისტული ვიზიტით იყო ჩამოსული, აშშ მოქალაქის პასპორტით და კოვიდრეგულაციებით გათვალისწინებული ყველა დოკუმენტის თანხლებით.
მას არ ჰქონდა დარღვეული ოკუპაციის შესახებ კანონი, შესაბამისად, მას ისევე, როგორც ნებისმიერ ამერიკელ, ევროპელ და მათ შორის რუს ტურისტს, უფლება ჰქონდა, კოვიდრეგულაციების დაცვით, შესაბამისი დოკუმენტაციის წარდგენის შემთხვევაში, საქართველოში შემოსულიყო.
ამავდროულად, რა მომენტშიც სტუმრების, თუ მათი მასპინძლების მხრიდან დარღვეული იქნა დაწესებული კოვიდშეზღუდვების მოთხოვნები, სახელმწიფომ მყისიერი რეაგირება მოახდინა და ჯარიმა გამოუწერა ყველას. ეს ნაწილიც ჩვენთვისაც ძალიან მიუღებელი იყო და არ იყო კარგი სურათი, გულწრფელად ვთქვათ...
ეს ყველაფერი არის ფსევდოპატრიოტიზმით შეფუთული სამარცხვინო ისტერია. ნაცაქტივისტებს, არც პოზნერი ადარდებთ, არც აფხაზეთი და არც სამაჩაბლო, მათ სრული ისტერიაა აქვთ, რადგან ქვეყნის შიგნითაც და გარეთაც გამარგინალდნენ და ერთადერთი, რაც დარჩენიათ, არის ქვეყანაში მუდმივი რყევებისა და დესტრუქციის მცდელობა. ისინი ქვეყნისთვის პრობლემების შექმნაში ხედავენ საკუთარ შანსს და ამ ნაწილში, ტრადიციულად მათი და რუსეთის ინტერესები სრულ თანხვედრაშია!“, – განაცხადა მამუკა მდინარაძემ.
