"ქართული ოცნება" "საერთო სასამართლოების შესახებ" ორგანულ კანონში ცვლილებების განხორციელებას გეგმავს. კანონპროექტი 24 მარტს დარეგისტრირდა და დღეს, 29 მარტს, ინიცირებისათვის ბიუროს სხდომაზე გავა.
მომზადებული ცვლილებები ვენეციის კომისიის რეკომენდაციებს ეყრდნობა.
კანონპროექტის მიხედვით, დამატებით, დარეგულირდება იუსტიციის უმაღლესი საბჭოს მიერ უზენაესი სასამართლოს მოსამართლეობის კანდიდატების შერჩევის საკითხები. კერძოდ, გაუქმდება იუსტიციის უმაღლეს საბჭოში არსებული ნახევრად ღია კენჭისყრის წესი და კენჭისყრები იქნება ღია. ასევე, საბჭოს მიერ კანდიდატების შერჩევას და პარლამენტისათვის წარდგენას საფუძვლად დაედება კანდიდატების შეფასებისას მათ მიერ დაგროვებული ქულები, რაც ნიშნავს ე.წ. "სარეიტინგო სიის" ფორმირებას. შედეგად, საბჭოს გადაწყვეტილებით, პარლამენტს ასარჩევად წარედგინება მხოლოდ საუკეთესო შეფასების მქონე მოსამართლეობის კანდიდატები.
ასევე, გათვალისწინებულია, საბჭოს წევრის მიერ კენჭისყრისას დაფიქსირებული ნებისმიერი პოზიციის დასაბუთების ვალდებულება, მიუხედავად იმისა, საბჭოს წევრი დაუჭერს თუ არა კანდიდატს მხარს.
ამავე ცვლილებით, გათვალისწინებულია, კანდიდატის მიერ გასაჩივრების შედეგად იუსტიციის უმაღლესი საბჭოს მიერ მიღებული ხელახალი გადაწყვეტილების ერთჯერადად გასაჩივრების შესაძლებლობა.
