საქართველოს საგარეო საქმეთა მინისტრი დავით ზალკალიანი, გუშინ, აშშ-ის სენატში გაკეთებულ განცხადებებს ერთმნიშვნელოვნად მხარდამჭერ გზავნილებად აფასებს და აცხადებს, რომ "დამოუკიდებელი საქართველოს ისტორიაში არასდროს არ გვქონია ისეთი თანამშრომლობა აშშ-თან, როგორიც ამჟამად გვაქვს". ამის შესახებ ზალკალიანმა ტელეკომპანია "იმედის" ეთერში განაცხადა.
ზალკალიანის თქმით, საქართველოს პარტნიორები აცნობიერებენე, რომ საქართველოს ევროპეიზაციისა და ქვეყნის ნატოში ინტეგრაციის კურსი არის შეუქცევადი.
"თავად ის ფაქტი, რომ სტრატეგიული პარტნიორი მნიშვნელოვან ადგილს უთმობს საქართველოში განვითარებულ მოვლენებს და სპეციალურ მოსმენა გაიმართა სენატში, მიანიშნებს იმაზე, რომ აშშ-ისთვის საქართველო, როგორც მთავარი სტრატეგიული პარტნიორი, თვლის მნიშვნელოვანად ქვეყანაში სტაბილურობას და ქვეყნის სტაბილურ განვითარება.
ჩვენ ცალსახად ვიხილეთ ძალიან მკაფიო გზავნილები. პირველ რიგში, ეს იყო ერთმნიშვნელოვნად მხარდამჭერი გზავნილები და ასევე გამოხატულება ორპარტიული მხარდაჭერისა სწორედ იმ ურთულესი გეოპოლიტიკური ვითარებიდან და საფრთხეებიდან გამომდინარე, რომლის წინაშეც დღეს ჩვენი ქვეყანა დგას. ეს ასევე ცალსახად მხარადჭერა იყო ქვეყნის პროდასავლური კურსის და ეს იყო ერთ-ერთი მნიშვნელოვანი გზავნილი, რაც ჩვენ გუშინ მოვისმინეთ", - განაცხადა დავით ზალკალიანმა.
შეგახსენებთ, 23 მარტს, ვაშინგტონში, სენატის საგარეო ურთიერთობათა კომიტეტის ევროპისა და რეგიონული თანამშრომლობის ქვეკომიტეტის სხდომაზე საქართველოს საკითხზე მოსმენა გაიმართა, რომელიც ქვეკომიტეტის თავმჯდომარემ, სენატორმა ჯინ შაჰინმა მოიწვია.
