"გიორგი გახარია უნდა დაბრუნდეს ქართულ პოლიტიკაში და ეს პოლიტიკას ნამდვილად სჭირდება", - აცხადებს რუსთავი 2-თან საუბრისას ექსპერტი გია ხუხაშვილი.
მისი განმარტებით, გახარიას "ორმხრივი ცეცხლის გაძლება მოუწევს", რადგან "ქართული ოცნება" იტყვის რომ ეს "ნაციონალური მოძრაობის" პროექტია, "ნაცმოძრაობა" კი ბიძინა ივანიშვილთან მის კავშირზე ისაუბრებს.
"ჩვენ ჩახარშული ვართ გარკვეულ ნეგატიურ ორპოლუსიანობაში. ალტერნატიული პოლიტიკური ცენტრები სჭირდება ქვეყანას იმისთვის, რომ რაღაც პოლიტიკური დინამიკა ავკრიფოთ და წარსულსა და აწმყოს შორის არჩევნის ამარა არ ვიყოთ. ასევე, იყოს მომავლის საინტერესო შეთავაზებები, გახარიამ გარკვეული პოლიტიკური კაპიტალი დააგროვა და საინტერესო იქნება მისი დაბრუნება.
პირველ ეტაპზე მას მოუწევს ორმხრივი ცეცხლის გაძლება, თავისთავად ცხადია, რომ ხელისუფლებაში იტყვიან, რომ ის მიშას შეეკრა, "ნაციონალები" იტყვიან, რომ ეს ბიძინას პროექტია. მას თუ უნდა იმ ელექტორატზე გასვლა, რომელსაც არც "ნაციონალები" მოსწონს და არც "ოცნება", უნდა მოახერხოს ამ ლაბირინთიდან მინიმალური დანაკარგებით გამოსვლა,"- აღნიშნა გია ხუხაშვილმა.
შეგახსენებთ, ყოფილმა პრემიერ-მინისტრმა გახარიამ განაცხადა, რომ პოლიტიკიდან წასვლას არ აპირებს.
