ხალხის შესაკრებად რესურსი არ აქვთ, რაზედაც მათივე მხარდამჭერები დასცინიან - განაცხადა "ქართული ოცნების" თავმჯდომარემ, ირაკლი კობახიძე ოპოზიციაზე საუბრისას, ტელეკომპანია "იმედის" ეთერში.
ირაკლი კობახიძის განცხადებით, ოპოზიციის გადაწყვეტილება აქციების გამართვაზე, კიდევ ერთხელ აჩვენებს მათ დამოკიდებულებას დიალოგის პროცესისა და საერთაშორისო პარტნიორების მიმართ.
"ესაა კიდევ ერთი კონტრპროდუქტიული ნაბიჯი, მით უმეტეს იმის გათვალისწინებით, რომ ოპოზიციას ხალხის შეკრების არავითარი რესურსი არ აქვს. მათ ჰქონდათ დაანონსებული 20 მარტს აქცია, თუმცა მოუწიათ ამ აქციის გაუქმება იმის გამო, რომ ხალხი ვერ იკრიბებოდა. ერთი მხრივ, ამტკიცებენ რომ თითქოს ხალხი არის აღშფოთებული არჩევნების „გაყალბებით“, მეორე მხრივ, ხალხი ვერ გამოჰყავთ. ეს მიანიშნებს იმაზე, რომ მათი ნებისმიერი მსჯელობა არის მცდარი და ისინი თვითონ ატყუებენ საზოგადოებას.
ამ პირობებში მათ არ აქვთ არავითარი რესურსი ხალხის შეკრების, ამის მიუხედავად მაინც აანონსებენ აქციებს ორი თვის თავზე, რაზეც მათ დასცინიან მათივე მხარდამჭერები უკვე. ეს არ წაადგება იმ პროცესს, რომელსაც წარმართავენ საერთაშორისო პარტნიორები ჩვენი ქვეყნის სასიკეთოდ", - განაცხადა კობახიძემ.
შეგახსენებთ, ევროპული საბჭოს პრეზიდენტის შარლ მიშელის პირადი წარმომადგენლის, კრისტიან დანიელსონის მედიაციით მიმდინარე მოლაპარაკებები უშედეგოდ დამთავრდა. ამის შემდეგ, ოპოზიციამ მუშაობის საგანგებო რეჟიმზე გადასვლის შესახებ განაცხადა. მათი თქმით, რეგიონებში დაიწყებენ მოსახლეობასთან შეხვედრებს და თბილისში მასშტაბურ აქციას 15 მაისს გამართავენ.
