რა გაცინებთ, თქვენს ადგილას რომ ვიყო დილიდან საღამომდე ვიტირებდი, ფარისეველი ხართ - ასე მიმართა პარლამენტის კულტურისა და განათლების კომიტეტის თავმჯდომარემ, თეა წულუკიანმა დეპუტატ ალეკო ელისაშვილს პლენარულ სხდომაზე.
თეა წულუკიანი გამოეხმაურა ალეკო ელისაშვილის განცხადებას, სადაც ოპოზიციონერმა დეპუტატმა დაგმო ბათუმის ბულვარში მრავალსართულიანი სასტუმროს მშენებლობა და მიანიშნა, რომ შესაძლოა, ეს თორნიკე რიჟვაძის მექრთამეობასთან იყოს დაკავშირებული.
"თქვენ ფარისევლობა შეგატყვეთ, ბატონო ალეკო, იმიტომ რომ ვითომ წუხხართ ახლა ბათუმზე, რა გაცინებთ ბატონო ალეკო, თქვენს ადგილზე რო ვიყო დილიდან საღამომდე ვიტირებდი, რა გაცინებთ, რა თავს აქიცინებთ, კაცო. თქვენ ხართ ჩვეულებრივი ფარისეველი, რომელიც წუხს ვითომ ახლა ბათუმის ბულვარზე კულტურულ მემკვიდრეობაზე. ერთადერთ კაცი ხართ ჩემს კომიტეტში, რომელიც წინააღმდეგ წავიდა იმისა, რომ ქართულ კულტურას ჰყოლოდა თავისი სამინისტრო. თქვენ ხართ ის კაცი, რომელიც თქვენზე ბევრად უფროს კაცებს და ქალებს მუთაქებს ეძახის, ეს არ არის კულტურა. შესაბამისად, ენა იმისთვის არ მოუცია ღმერთს, მით უმეტეს კაცისთვის, რომ ყველაფერი ილაპარაკოს," - განაცხადა თეა წულუკიანმა.
ამასთან, წულუკიანმა განაცხადა, რომ ბათუმის ბულვარში მრავალსართულიანი სასტუმროს აშენებას თავადაც არ ეთანხმება.
