ოპოზიციის ნაწილიდან ესკალაციისთვის მზადება ძალიან მაღალი იყო, ნებისმიერი გადაწყვეტილება რაც არ უნდა ყოფილიყო მიღებული. ამიტომ არჩევანი გაკეთდა სამართლებრივ გადაწყვეტილებაზე, - ამის შესახებ პარლამენტის ვიცე-სპიკერმა, დავით სერგეენკომ ნიკა მელიას დაკავების შემდეგ განაცხადა.
მისი თქმით, ის მოვლენები, რაც ბოლო პერიოდში ვითარდება და ის რაც, დილით განვითარდა სამი ნაწილისგან შედგება: ეს არის სამართლებრივი, პოლიტიკური და საინფორმაციო.
„მნიშვნელოვანია, რომ გამოძიებამ და სასამართლომ მაქსიმალურად სწრაფად, მოკლე დროში გააკეთოს აქცენტირება სამართლებრივზე და მალე მიიღოს სამართლიანი გადაწყვეტილება, იმისათვის რომ დანარჩენი ორი პუნქტი პოლიტიკური და საინფორმაციო, ის რაც ჭარბად არის იყოს შემცირებული და აქცენტი გადავიდეს სამართლებრივ ნაწილზე, რაც არ უნდა პოლიტიკური სარჩული ჰქონდეს ამას. მმართველი ძალა ყოველთვის პასუხისმგებელია ქვეყანაში მიმდინარე მოვლენებზე“, - განაცხადა დავით სერგეენკომ.
დილის 7:30-ზე "ნაციონალური მოძრაობის" ოფისში სამართალდამცველები მივიდნენ, რომელთაც მალევე, სპეცრაზმიც შეუერთდა.
სამართალდამცველებმა მოქალაქეებს მოუწოდეს გაეთავისუფლებინათ პარტიის შენობა, უარის შემდეგ კი შენობაში შევიდნენ. მათ ოპოზიცია ხელაწეულები დახვდა. შენობიდან გაუშვეს მედია.
მხარდამჭერებს დაკავებამდე მიმართა პარტიის თავმჯდომარემ ნიკა მელიამ და მათ არაძალადობრივი წინააღმდეგობისკენ მოუწოდა.
ნიკა მელიას ედავებიან ჯგუფური ძალადობის ხელმძღვანელობას და მასში მონაწილეობას. საქმე ეხება 2019 წლის 20 ივნისს პარლამენტის შენობასთან განვითარებულ მოვლენებს.
2019 წლის 27 ივნისის განჩინებით, ნიკა მელიას აღკვეთის სახით 30000-ლარიანი გირაო შეეფარდა, მაშინ პარლამენტმა მას დეპუტატის იმუნიტეტი პირველად მოუხსნა. მან პირველ ჯერზე გადაიხადა 30000 ლარი, თუმცა მას შემდეგ რაც, 2020 წლის 1-ელ ნოემბერს პარლამენტთან აქციაზე ელექტრონული სამაჯური დემონსტრაციულად მოიხსნა, გენერალურმა პროკურატურამ კიდევ ერთხელ მიმართა სასამართლოს, რათა ნიკა მელიას გირაოს სახით 100 000 ლარი შეფარდებოდა, თუმცა სასამართლომ 40 000 ლარი განუსაზღვრა. ნიკა მელიამ განაცხადა, რომ ის გირაოს არ გადაიხდიდა.
ნიკა მელიას თბილისის საქალაქო სასამართლომ აღკვეთის ღონისძიებად პატიმრობა 2021 წლის 17 თებერვალს შეუფარდა. 18 თებერვალს, გიორგი გახარიამ პრემიერ-მინისტრის თანამდებობა დატოვა. ამასთან დაკავშირებით კი, შინაგან საქმეთა სამინისტრომ მელიას საქმეზე დაგეგმილი ღონისძიება დროებით გადადო.
ნიკა მელიას დაკავების გადაწყვეტილების აღსრულება მას მერე დაიწყო, რაც გუშინ პარლამენტმა პრემიერის პოსტზე ირაკლი ღარიბაშვილს დაუჭირა მხარი, მან კი სიტყვით გამოსვლაში თქვა, რომ მელიას საქმეზე კანონი უნდა აღსრულდეს.
