უნგრეთი პირველი ქვეყანა გახდა ევროკავშირში, რომელმაც რუსული წარმოების ვაქცინა Sputnik V-ის გამოყენებაზე წინასწარი თანხმობა გასცა. ამის შესახებ BBC-ი იუწყება.
პრემიერ-მინისტრი ვიქტორ ორბანის ადმინისტრაციის უფროსის განცხადებით, ამ დროისთვის ეროვნული მარეგულირებლის მიერ თანხმობა რუსულ ვაქცინასა და ოქსფორდ/ასტრაზენეკას ვაქცინებზე გაიცა.
გავრცელებული ინფორმაციით, უნრეთის საგარეო საქმეთა მინისტრი პიტერ სიიარტო შემდგომი მოლაპარაკებების მიზნით გაეშურება მოსკოვში, რათა განიხილოს ტვირთის გადაზიდვისა და განაწილების საკითხი.
მანამდე პრემიერ-მინისტრმა ორბანმა განაცხადა, რომ Pfizer/BioNTech-ი ვაქცინის მიწოდებას ძალზედ ნელა ახორციელებს, რაც იძულებულს ხდის უნგრეთს, ეძებოს ალტერნატიული გზები ვაქცინის შესასყიდად. ალტერნატიულ გზად ორბანს რუსეთი და ჩინეთი მიაჩნია.
ამავდროულად უნგრეთის ჯანდაცვის ოფიციალური პირები იმყოფებიან ჩინეთში, რათა იქაურ ხელისუფლებასთან ჩინური ვაქცინის Sinopharm-ის მილიონი დოზის შესყიდვის შესახებ გააფორმონ ხელშეკრულება. ჩინურ ვაქცინას უკვე გამოიყენებს უნგრეთის მეზობელი სერბეთი.
გასულ თვეში, ჩინეთის სახელმწიფო მფლობელობაში არსებულმა კომპანია Sinopharm-მა განაცხადა, რომ მის მიერ წარმოებულმა ვაქცინამ 79%-იანი ეფექტურობა აჩვენა.
ამ დროისთვის, უნგრეთში სულ მცირე 140 000 მოქალაქე აიცრა.
ფოტო: AFP
