"კანონპროექტი "თავისუფლების ქარტია" საკანონმდებლო ბაზის სრულყოფისთვის შექმნილი დამატებითი დოკუმენტია ქვეყნის უსაფრთხოების სისტემის, თავდაცვისა და უშიშროების ეფექტურობის გაძლიერების მიზნით", - აცხადებს კანონპროექტის ავტორი პარლამენტის წევრი გია თორთლაძე.
თოღთლაძის განმარტებით, კანონპროექტის შექმნის მიზეზი გახდა ქვეყანაში შექმნილი რეალობა, აფხაზეთისა და ყოფილი სამხრეთ ოსეთის ავტონომიური ოლქის ტერიტორიების ოკუპაცია და ყოფილი სსრკ-ს სპეციალური სამსახურების და მისი სამართალმემკვიდრეების ჯერ კიდევ ძლიერი გავლენა ქვეყნის შიდა პოლიტიკაზე. საპარლამენტო ოპოზიციის წარმომადგენლის, გია თორთლაძის საკანონმდებლო ინიციატივას - "თავისუფლების ქარტიას" მიმდინარე კვირაში პარლამენტის იურიდიული, თავდაცვისა და უშიშროების და ადამიანის უფლებათა დაცვის კომიტეტები ერთობლივ სხდომაზე განიხილავენ.
თორთლაძის განმარტებით, კანონპროექტის მიღების მიზეზს წარმოადგენს საქართველოს კონსტიტუციით, კანონმდებლობით განსაზღვრული მოქალაქეთა უფლებების დაცვა და სამართლებრივი პრინციპების დამკვიდრება, რათა განხორციელდეს კონსტიტუციით გარანტირენული უფლებების და მოვალეობის უზრუნველყოფა.
მისი თქმით, კანონპროექტის მიზანია საერთაშორისო სტანდარტების საყოველთაოდ აღიარებული პრინციპებისა და ნორმების გათვალისწინებით, უზრუნველყოფილი იქნეს დანაშაულის წინააღმდეგ ბრძოლის სამართლიანი და ადეკვატური მიდგომები და რაც მთავარია, მოხდეს კანონმდებლობაში განსაზღვრული ნორმების ეფექტური ამუშავება და დანაშაულის წინააღმდეგ ბრძოლის მაქსიმალური უზრუნველყოფა. ქვეყნის ეროვნული უსაფრთხოების უზრუნველყოფა, სახელმწიფოს და მოსახლეობის ინტერესების დაცვა.
"თავისუფლების ქარტიის" ძირითადი მუხლები ითვალისწინებს "სამართალდამცავი და სახელმწიფო ორგანოთა კოორდინაციას" ტერორიზმის წინააღმდეგ ეფექტური ბრძოლის განხორციელების, დანაშაულის პრევენციისა და გახსნის მიზნით, რაც გულისხმობს საქართველოს მთავრობის, ეროვნული ბანკის, იუსტიციის სამინისტროს სამოქალაქო და საემიგრაციო სამსახურების, ფიზიკური და იურიდიული პირების მიერ, თავიანთი კომპეტენციის ფარგლებში, ტერორისტული აქტებთან დაკავშირებით დანაშაულის შემცველი თუ ოპერატიულ სამსახურებში არსებული ინფორმაციის შინაგან საქმეთა სამინისტროსთვის მიწოდების ვალდებულებას; ქვეყნის საემიგრაციო კონტროლის გაძლიერებასა და ოკუპირებული ტერიტორიების შესახებ კანონით განსაზღვრული ტერიტორიების პირობითი საზღვრების მონიტორინგს; "საზღვაო, სახმელეთო და საჰაერო საზღვრების, სტრატეგიული მნიშვნელობის ობიექტების და ტვირთების მონიტორინგს", ტერორისტული აქტების თავიდან აცილების მიზნით.
ამასთან, კანონპროექტი ტერორიზმის დაფინანსების, ფინანსური სახსრების ან სხვა უძრავი ქონების მიწოდების გამოვლენის და აღკვეთის მიზნით ფინანსთა და ეკონომიკის სამინისტროებს, ეროვნულ და კომერციულ ბანკებს ავალდებულებს, უზრუნველყონ შესაბამისი სამსახურების დროული ინფორმირება საზოგადოებრივ ორგანიზაციებზე და კერძო პირებზე დიდი ოდენობით წარმოებული ფინანსური ოპერაციების და საბანკო გადარიცხვების შესახებ.
"შეიმუშაონ დაფინანსების წყაროების და ფინანსური ოპერაციების გამოვლენის დამატებითი მექანიზმები", - ნათქვამია კანონპროექტში.
ასევე, სახელმწიფოს წინააღმდეგ დანაშაულის პრევენციის, ქვეყნის დემოკრატიული განვითარების უზრუნველსაყოფად კანონპროექტი ითვალისწინებს სპეციალური კომისიის შექმნას, ყოფილი სსრკ-ის სპეცსამსახურების საიდუმლო თანამშროლებისა და კანონპროექტით დადგენილი თანამდებობის პირების რეესტრის წარმოების მიზნით.
"სახელმწიფო კომისია დადგენილი წესით აგროვებს მონაცემებს იმ პირთა შესახებ, რომლებიც საიდუმლოდ თანამშრომლობდნენ სპეცსამსახურებთან და აწარმოებს შესაბამის რეესტრს, ასევე აგროვებს ინფორმაციას კომუნისტური, ფაშისტური სიმბოლიკის, საკულტო ნაგებობების, ძეგლების, მონუმენტების, ბარელიეფების წარწერების, ქუჩების და მოედნების დასახელებების თუ სხვა საჯარო თავშეყრის ადგილების შესახებ, რომლებიც მოიცავენ კომუნისტური და ფაშისტური იდეოლოგიის და პროპაგანდის ელემენტებს თუ მათი იდეოლოგიის ლიდერთა განმსაზღვრულ სახელწოდებებს", - ნათქვამია კანონპროექტში და აღნიშნულია, რომ შს სამინისტროს შესაბამისი სამსახურები უზრუნვეყოფენ კომისიისთვის იმ პირთა შესახებ მონაცემების მიწოდებას, რომლებიც თანამშრომლობდნენ სპეცსამსახურებთან.
კანონპროექტი ითვალისწინებს სპეცსამსახურების საიდუმლო თანამშრომლების ნებაყოფლობით აღიარებას სახელმწიფო კომისიის წინაშე და მათ პასუხისმგებლობას ამ კანონის შეუსრულებლობის შემთხვევაში.
