შეერთებული შტატების მოქმედი პრეზიდენტის დონალდ ტრამპის ადმინისტრაცია გეგმავს, დახუროს ამერიკის ბოლო ორი დარჩენილი გენერალური საკონსულო რუსეთში. ინფორმაციას Associated Press-ი ავრცელებს.
გამოცემის ინფორმაციით, ადმინისტრაციამ საკონსულოების დახურვის განზრახვის შესახებ კონგრესს 10 დეკემბერს აცნობა.
გასულ კვირას სახელმწიფო დეპარტამენტმა კონგრესმენებს აუწყა, რომ დეპარტამენტი სამუდამოდ დახურავს გენერალურ საკონსულოს ვლადივოსტოკში და დროებით შეაჩერებს ეკატერინბურგის საკონსულოს მუშაობას.
კონგრესისთვის წარდგენილ შეტყობინებაში ნათქვამია, რომ საკონსულოების დახურვა პასუხია რუსეთის პოლიტიკისა, რომელიც 2017 წლიდან რუსეთში მომუშავე ამერიკელი დიპლომატების რაოდენობის შეზღუდვას ითვალისწინებს.
გენერალური საკონსულოების დახურვის შემდეგ, ამერიკის ერთადერთი დიპლომატიური წარმომადგენლობა რუსეთში მოსკოვში მდებარე საელჩო იქნება.
შეგახსენებთ, 2018 წელს მოსკოვის მოთხოვნით აშშ-მა დახურა გენერალური საკონსულო პეტერბურგში, მას შემდეგ რაც სკრიპალების მოწამვლის შემდეგ, ამერიკის მოთხოვნით რუსეთის გენერალური საკონსულო დაიხურა სიეტლში.
ფოტო: TASS
