ხვალ დილიდან ვაცხადებთ მასობრივ მობილიზაციას. ივანიშვილს არ მივცემ საშუალებას, მოიპაროს ქართველი ხალხის არჩევანი. დადექით მაგრად, ბოლომდე მივაწვებით, ბოლომდე შევაჯდებით და ბოლომდე დავიცავთ ჩვენი გამარჯვების უფლებას, – ამის შესახებ საქართველოს ყოფილმა პრეზიდენტმა, მიხეილ სააკაშვილმა ტელეკომპანია „მთავარი არხის“ ეთერში განაცხადა.
მისი თქმით, საარჩევნო უბნებში შემაჯამებელი ოქმების გადაწერა განხორციელდა.
მან ოპოზიციურ პარტიებს გაერთიანებისკენ მოუწოდა. სააკაშვილის განცხადებით, თითოეული ხმა დასაცავია და გვერდზე დგომის დრო არ არის.
„მინდა, მოვუწოდო ყველა სხვა ოპოზიციურ ძალას, მეგობრებო, მესმის, რომ ყველა არ არის კმაყოფილი თავისი საარჩევნო შედეგით. ახლა აღარ არის კონკურენციის დრო, თითოეული თქვენგანის ხმა არის დასაცავი. ახლა აღარ არის გვერდზე დგომის და გვერდიდან სეირის ყურების დრო. ახლა ყველანი ჩვენ ვდგებით ერთად, ვაყალიბებთ ეროვნული ერთიანობის მთავრობას, ყველანი ერთად გვერდით ვწევთ ივანიშვილს და ამ ბანდას, ან ჩვენ ვკარგავთ ქვეყანას და ვწყვეტთ არსებობას.
ან ახლა ჩვენ ვხდებით ჩვეულებრივი ბელარუსი, რუსეთის ფედერაცია, რომელიღაც შუა აზიელი დიქტატურა, ან ჩვენ ვხდებით თავისუფალი ქვეყანა, სადაც მოქალაქეებს დაედგომებათ და სადაც თავისუფლად ცვლიან მთავრობას, თავისუფლად ხდება ნების გამოხატვა და ამ ნების პატივისცემა, თუნდაც ჭკუიდან გადასული რომელიმე მმართველის მხრიდან. დადექით მაგრად, ბოლომდე მივაწვებით, ბოლომდე შევაჯდებით და ბოლომდე დავიცავთ ჩვენი ხალხის წმიდათა წმიდა სიმართლეს, ჩვენი თავისუფლების და ჩვენი გამარჯვების უფლებას. ქართველ ხალხს აქვს გამარჯვების უფლება, მან მოიპოვა ეს გამარჯვება და ეს ქურდბაცაცა ღამე ვერ მოიპარავს“, – განაცხადა მიხეილ სააკაშვილმა.
