"დღეს ჩვენ დავაფუძნეთ ქართულ-გერმანული ფორუმი, ვინაიდან მნიშვნელოვნად მიგვაჩნია საქართველოსა და გერმანიას შორის ურთიერთობების ინტენსიფიკაცია, როგორც პოლიტიკურ დონეზე, ასევე ეკონომიკისა და კულტურის მიმართულებებით," - ამის შესახებ გერმანიის ბუნდესტაგის წევრმა და გერმანულ-ქართული ფორუმის თავმჯდომარემ, აქსელ ფიშერმა აღნიშნული ფორუმის გახსნისას განაცხადა.
მისი თქმით, გერმანული მხარის მიზანია ხელი შეუწყოს ორ ქვეყანას შორის სხვადასხვა სფეროში ურთიერთგაცვლის წახალისებას, ვინაიდან გერმანიას, თავის გვერდზე საქართველოს სახით ძლიერი პარტნიორის ხილვა სურს.
"განსაკუთრებით ამ რთულ დროს - კორონა პანდემიის პირობებში, როდესაც ჩვენ ერთმანეთისაგან განვცალკევდით და სულ უფრო ნაკლებად ვსაუბრობთ ერთმანეთთან, ჩვენ გვსურს საპირისპირო - ერთმანეთთან მეტი საუბარი. ჩვენ, გერმანელ დეპუტატებს და საქართველოს მეგობრებს გვსურს ქართველ პარლამენტარებთან და ქართველ ხალხთან მეტი კონტაქტი და გვინდა დავამტკიცოთ, რომ ერთიანობა მნიშვნელოვანია. ჩვენი სურვილია მოსწავლეებს შორის ურთიერთგაცვლის გაძლიერება, მეცნიერების დარგში მხარდაჭერა და ასევე პოლიტიკური, ეკონომიკური და კულტურული კონტაქტების წახალისება." - აღნიშნა ფიშერმა.
2020 წლის 26 ოქტომბერს გერმანიის ბუნდესტაგში გერმანულ-ქართული ფორუმი დაფუძნდა, რომლის დაარსების წესდებასაც ხელი ბუნდესტაგის დეპუტატებმა მოაწერეს.
ფორუმის მიზანს წარმოადგენს საქართველო-გერმანიას შორის არსებული ტრადიციულად კარგი ურთიერთობების განმტკიცება და გაფართოება, გერმანიის პოლიტიკურ და საზოგადოებრივ წრეებში საქართველოს შესახებ ცნობადობის ამაღლება, ორ ქვეყანას შორის პოლიტიკური, ეკონომიკური, კულტურული და სამეცნიერო თანამშრომლობის გაძლიერება.