აზერბაიჯანი, საქართველოს გავლით, თურქეთში ელექტროენერგიის ტრანსპორტირებისთვის ემზადება.
"აზერენერჯის" ხელმძღვანელის ეტიბარ პირვერდიევის განმარტებით, 2011 წლისთვის მინგეჩავირიდან საქართველოს საზღვრამდე, 500 კვ-იანი ელეტროგადამცემი ხაზის რეკონსტრუქცია დასრულდება.
"პროექტი სახელმწიფო ბიუჯეტოდან ფინანსდება. 2012 წლიდან კი შესაძლებლობა გვექნება საქართველოს გავლით თურქეთში ელეტროენერგიის ექსპორტი განვახორციელოთ,"- განაცხადა "აზერენერჯის" ხელმძღვანელმა.
აღსანიშნავიია, რომ ამ პროექტის განხორციელება აზერბაიჯანის სახელმწიფო ბიუჯეტს 5 მლრდ. მანათი უჯდება.
ელექტროენერგეტიკული კორიდორის "აზერბაიჯანი-საქართველო-თურქეთი" შესახებ ჯერ კიდევ 2009 წლის შემოდგომით ალაპარაკდნენ.
2010 წლის 22-23 სექტემბერს შპს "საქართველოს სახელმწიფო ელექტროსისტემის" დელეგაციის აზერბაიჯანში ვიზიტის დროს, სსე-სა და სს "აზერენერჯის" შორის ქალაქ ბაქოში გაფორმდა მემორანდუმი "საქართველოსა და აზერბაიჯანის რესპუბლიკების ენერგოსისტემებს შორის ელექტროენერგეტიკული კავშირების განვითარების შემდგომი ღონისძიებების შესახებ".
მემორანდუმს საქართველოს მხრიდან ხელი მოაწერა სსე-ს რეაბილიტაციის მმართველმა ბატონმა სულხან ზუმბურიძემ, ხოლო აზერბაიჯანის მხრიდან - "აზერენერჯის" ვიცე-პრეზიდენტმა მარლენ ასკეროვმა.
შეგახსენებთ, რომ შეხვედრაზე აზერბაიჯანული მხარე დაინტერესდა სსე-ს მიერ განხორციელებული, საქართველო-თურქეთის მაკავშირებელი 400 კვ. მაღალი ძაბვის ეგხ "ახალციხე-ბორჩხას" მშენებლობის პროექტით.
აზერბაიჯანულმა მხარემ ასევე გამოთქვა მზადყოფნა, პროექტის განხორციელების შემდეგ ჩაერთოს ელექტროენერგიის გადაცემის რეჟიმში ახალი ხაზების დერეფნის გამოყენებით.
შედეგად, მხარეები შეთანხმდნენ ქვერეგიონალური პროექტის "ენერგოხიდი აზერბაიჯანი-საქართველო-თურქეთი"-ს ფარგლებში აზერბაიჯანსა და საქართველოს შორის ელექტროენერგიის მიწოდების სქემებისა და სიმძლავრის გადადინების რეჟიმების ურთიერთშეჯერებასა და კვლევაზე, მომავალში ამ ქვეყნების ელექტროქსელების განვითარების პერსპექტივით.
მემორანდუმში ასევე ხაზგასმულია, რომ აუცილებელია საქართველოსა და აზერბაიჯანის ენერგოსისტემებს შორის საიმედო კავშირი. ამ მიზნით, მხარეები შეთანხმდნენ აზერბაიჯანი-საქართველოს მაკავშირებელი 500 კვ ეგხ. "მუხრანის ველი"-ს აღდგენაზე, რის შედეგადაც მნიშვნელოვნად გაიზრდება ორივე ქვეყნის ენერგეტიკული უსაფრთხოება და მომხმარებელთა ენერგომომარაგების სტაბილურობა. ასევე ორივე ქვეყნის ენერგოსისტემას ახალი შესაძლებლობა მიეცემა ელექტროენერგიის ექსპორტ-იმპორტისა და ტრანზიტისათვის ორივე მიმართულებით.
2011 წლის 1 იანვრამდე ქართული მხარე ინფორმირებული იქნება აზერბაიჯანის ტერიტორიაზე განსახორციელებელი სამუშაოების ვადების შესახებ. პასუხად, ქართულმა მხარემ გამოთქვა მზადყოფნა, დაასრულოს სამუშაოები საქართველოს ტერიტორიაზე, აზერბაიჯანული მხარის მიერ ეგხ. "მუხრანის ველის" აღდგენის შესახებ შეთანხმებაზე ხელის მოწერიდან 18 კალენდარული თვის განმავლობაში.
ბაქოში ვიზიტის დროს ასევე მიღწეულ იქნა და მემორანდუმში აისახა მხარეთა წინასწარი შეთანხმებები მოქმედი 330 კვ. სისტემათაშორისი ხაზით "გარდაბანი" ელექტროენერგიის აღრიცხვის სისტემებთან შემდგომ განვითარებასა და აღრიცხვის დამატებითი სახელშეკრულებო-მეთოდური ბაზის ფორმირებაზე.
