რაჭა-ლეჩხუმ–ქვემო სვანეთის გუბერნატორმა არჩილ ჯაფარიძემ და მისმა მოადგილემ დავით ღუდუმიძემ დღეს თანამდებობები დატოვეს.
ჯაფარიძე აცხადებს, რომ გადაწყვეტილება დიდი ხნის წინ ჰქონდა მიღებული და განცხადება საკუთარი სურვილით დატოვა, თუმცა არსებული ინფორმაციით, გუბერნატორის თანამდებობიდან გადაყენებას წინ მაჟორიტარ დეპუტატ გოჩა ენუქიძესთან დაპირისპირება უძღოდა, რომელიც 2020 წლის საპარლამენტო არჩევნებში კენჭს კვლავ "ქართული ოცნების" სახელით იყრის.
გუშინ სტიქიით დაზარალებულ რეგიონში პრემიერ-მინისტრი გიორგი გახარია იმყოფებოდა, რომელმაც განაცხადა, რომ სტიქიით დაზარალებული სოფლების მომარაგებაში პრობლემა არ შეიქმნება და "ამაზე პასუხს აგებენ გუბერნიაც და ადგილობრივი ხელისუფლებაც", თუმცა ნაკლებად სავარაუდოა, რომ არჩილ ჯაფარიძის და მისი მოადგილის თანამდებობიდან გაშვება სტიქიიდან მეორე დღეს ამას უკავშირდებოდეს.
ოპოზიცია ამბობს, რომ არჩილ ჯაფარიძე კლანებს შორის დაპირისპირებას შეეწირა და რეგიონში ამჯერადაც მოქმედმა მაჟორიტარმა დეპუტატმა, "ნაციონალური მოძრაობიდან" პორტირებულმა გოჩა ენუქიძემ გაიმარჯვა, რომელიც კიდევ ერთხელ გადეპუტატებისთვის არჩევნების წინ ფულს და "მოწყალებას" არ იშურებს, თუმცა არჩევნებში გამარჯვების შემდეგ რეგიონი შემდეგ საარჩევნო დაპირისპირებამდე ავიწყდება.
ამ ყველაფერს წინ უძღოდა ბოლო პერიოდში შავი პიარი არჩილ ჯაფარიძის წინააღმდეგ გოჩა ენუქიძის გარემოცვიდან, რომელიც მას შემდეგ დაიწყო, რაც ცნობილი გახდა, რომ რეგიონში მაჟორიტარ დეპუტატად "ქართული ოცნება" სწორედ არჩილ ჯაფარიძის წარდგენას გეგმავდა. მას მოსახლეობის მხარდაჭერაც ჰქონდა, რადგან როგორც ამბობენ, ის მუდმივ კონტაქტზე იყო ადგილობრივებთან და ცდილობდა, უყურადღებოდ არავინ დაეტოვებინა, თუმცა როგორც ჩანს, კლანურ მფარველობას 12-წლიანი უწყვეტი დეპუტატის მილიონებიც წაეშველა, რომელიც რა გზით არის ნაშოვნი, ეს ალბათ, კიდევ ცალკე თემაა.
როგორც ამბობენ, გოჩა ენუქიძის სახელი უკავშირდება არაერთ კრიმინალურ გარჩევას და ბურუსით მოცულ წარსულს, თუმცა რაჭა-ლეჩხუმ–ქვემო სვანეთში დიდი ავტორიტეტის მქონე არჩილ ჯაფარიძეს "ოცნებამ" მაინც ენუქიძე და მისი კრიმინალური გავლენები ამჯობინა.
არჩილ ჯაფარიძის დასუსტება რამდენიმე თვის წინ დაიწყო, ნელ-ნელა "მოაშორეს" ყველა, ვინც რეგიონის ყველა მუნიციპალიტეტში ჰყავდა და ვისი იმედიც შეიძლება ჰქონოდა და ბოლოს, თანამდებობა იძულებით, ნაძალადევი სიცილით "საკუთარი განცხადების საფუძველზე", დაატოვებინეს იმ დროს, როდესაც რაჭა სტიქიის შედეგებს ებრძვის. ყოფილ გუბერნატორს ბოლო ორი დღე საზოგადოებასთან გამოჩენაც კი აკრძალული ჰქონდა, დღეს დილით სამსახურში ყველაზე ადრე მივიდა და დაელოდე, როდის ეტყოდნენ, რომ თანამდებობიდან წასვლის შესახებ განცხადება როდის გაევრცელებინა.
რთული სათქმელია, რა ვალშია "ქართული ოცნება" ყოფილ "ნაციონალ" გოჩა ენუქიძესთან, რომ მის მორიგჯერ გასადეპუტატებლად ხალხის მხარდაჭერილ გუბერნატორს იშორებს, ან რატომ ფიქრობს, რომ ენუქიძე ან მას უერთგულებს, როგორც კი გემი ჩაძირვას დაიწყებს, მაგრამ ამჟამად მოცემულობა ასეთია - საქმის მკეთებელს მილიონის მკეთებელი ამჯობინა, დაველოდოთ, ვის როგორ შემოუბრუნდება ფულზე გაცვლილი ერთგულება.