უმძიმესი სანახავია კომპეტენციისგან, შინაარსისგან დაცლილი, სასოწარკვეთილი და დეგრადირებული ოპოზიცია. ეს განცხადება საქართველოს პრემიერ-მინისტრმა, გიორგი გახარიამ პარლამენტში გამოსვლის დროს გააკეთა.
მისი თქმით, დღევანდელი პარლამენტის სხდომა პოლიტიკური განცხადებების რეჟიმში გადავიდა, ნაცვლად იმისა, რომ ეკონომიკაზე ემსჯელათ.
"მიუხედავად იმისა, რომ სულ სხვა რაღაცის თქმას ვაპირებდი, ახლა მინდა, ცოტა სხვანაირად ვთქვა. არა მხოლოდ ჩემთვის, იმ ადამიანებისთვის, მოქალაქეებისთვის, რომლებიც ამას უყურებენ, დარწმუნებული ვარ, უმძიმესი საყურებელია კომპეტენციისგან, შინაარსისგან დაცლილი, მორალზე საერთოდ არ ვსაუბრობ, სასოწარკვეთილი და დეგრადირებული ოპოზიცია, რომელიც ცდილობს, გაჭირვება, ბავშვების გაჭირვება, თითოეული მოქალაქის სიღარიბე გამოიყენოს. შოკურ კრიზისზე ადამიანები გვთავაზობენ, გრძელვადიანი ინსტრუმენტებისა და სახელმწიფო რესურსების ამოღებას, დახარჯვას. საპენსიო ფონდზე საუბარი აღარ მინდა, მაგრამ ყველას უნდა გვესმოდეს, რომ საპენსიო ფონდი არის მოხუცებულობაში ჩვენი მოქალაქეების სოციალური გარანტია, რომელიც თურმე დღეს უნდა დავხარჯოთ", - განაცხადა გახარიამ.