საქართველოს ელჩი უკრაინაში უარყოფს რომ ზურაბ ადეიშვილი უკრაინის გენპროკურორის მრჩევლად დაინიშნა. თეიმურაზ შარაშენიძემ „ქრონიკას“ განუცხადა, რომ საქართველოს ყოფილი გენერალური პროკურორი, ზურაბ ადეიშვილი უკრაინაში საკადრო საატესტაციო კომისიის ხელმძღვანელის პოსტზე სამი კვირის განმავლობაში მუშაობდა, რადგან ეს სამსახური ამ პერიოდის შემდეგ გაუქმდა.
„ზურაბ ადეიშვილი დანიშნული იყო წინა გენერალური პროკურორის მიერ საკადრო საატესტაციო კომისიის ხელმძღვანელად. ამ კომისიამ იმუშავა სამი კვირის განმავლობაში და შემდეგ გაუქმდა. ახლა მოვიდა ახალი გენერალური პროკურორი და დაიწყო კადრების ცვლა. შეთავაზებენ თუ არა მას რაიმე ახალს, ვერ გეტყვით, არ ვიცი დანამდვილებით. უნდა დაველოდოთ მოვლენების განვითარებას. ამ ეტაპზე, მისთვის რაიმე შეთავაზება არ არის“, - განაცხადა თეიმურაზ შარაშენიძემ.
საქართველოს ყოფილმა პრეზიდენტმა, მიხეილ სააკაშვილმა 10 მაისს განაცხადა, რომ ზურაბ ადეიშვილი გენერალური პროკურორის მრჩევლად მუშაობს.
