რუსეთში ნაცისტური გერმანიის დამარხცების 75-ე წლისთავი მოკრძალებულად აღნიშნეს. კორონავირუსის პანდემიის გამო გადაიდო ამ დღესთან დაკავშირებული ტრადიციული სამხედრო აღლუმი.
მცირე მასშტაბის ღონისძიების ფარგლებში, რუსეთის პრეზიდენტმა ყვავილებით შეამკო უცნობი ჯარისკაცის მემორიალი.
ამავე ადგილიდან პუტინმა მოსახლეობას მიმართა, რომელიც ტელევიზიით გადაიცემოდა.
"ჩვენი ვეტერანები იბრძოდნენ ჩვენი სიცოცხლისთვის, სიკვდილის წინააღმდეგ. ჩვენ ვიცით და გვჯერა, რომ უძლეველები ვართ, როდესაც ერთად ვდგავართ“, - მიმართა მან საკუთარ მოსახლეობას.
საიუბილეო ღონისძიების ფარგლებში, წითელ მოედანს გადაუფრინა 75-მა სამხედრო თვითმფრინავმა, რომელთაც ცაში კვამლით რუსეთის დროშის კვალი დატოვეს.
რუსეთისგან განსხვავებით, ტრადიციული სამხედრო აღლუმის გადადებაზე უარი თქვა ბელარუსმა.
მეშვიდე დღეა რუსეთში კორონავირუსით ინფიცირების დღიური მაჩვენებელი 10 000-ს აჭარბებს.
ოფიციალური ინფორმაციით, კორონავირუსით ინფიცირების მაჩვენებლით, რუსეთი მსოფლიოში მეხუთე ადგილზეა.