10-13 ოქტომბერს საქართველოს ტექნიკური უნივერსიტეტი მასპინძლობს სტუდენტთა და ახალგაზრდა მეცნიერთა კონფერენციას "1-St International Conference for Students and Young Scientists on Materials Processing Science".
კონფერენცია საქართველოს ტექნიკური უნივერსიტეტის ადმინისტრაციულ კორპუსში ტარდება. მისი მხარდამჭერები არიან საქართველოს ტექნიკური უნივერსიტეტი, ევროპის კერამიკოსთა საზოგადოება და მისი ჟურნალის ფონდი "JECS TRUST".
საქართველოს ტექნიკური უნივერსიტეტის რექტორის, არჩილ ფრანგიშვილის განცხადებით, ახლგაზრდებს ეძლევათ საშუალება, არა მარტო წარდგნენ საზოგადოების წინაშე თავიანთი სამეცნიერო ნაშრომებით, არამედ დაამყარონ კონტაქტები მომიჯნავე დარგის ახალგაზრდა მეცნიერებთან როგორც საქართველოში, ისე საზღვარგარეთ.
კონფერენციაზე ახალგაზრდები წარმოადგენენ თემებს, სახელწოდებით: ნანომასალები და ნანოტექნოლოგიები; ექსპერიმენტული მაღალი ტექნოლოგიები; ბიოკერამიკა და მიკრობიოლოგია; ინოვაციები ფუნქციონალურ და კონსტრუქციულ მასალებსა და ტექნოლოგიებში; კერამიკული და პოლიმერული კომპოზიციები და სხვა. აღსანიშნავია, რომ კონფერენციის მუშაობაში ევროპის ხუთი ქვეყნის წარმომადგენლებიც მიიღებენ მონაწილეობას.
შეხვედრის მიზანი ახალგაზრდა მეცნიერების, ექსპერტებისა და ტექნიკური დარგის სპეციალისტების ერთობლივი მუშაობა და ამ დარგში დაგროვილი გამოცდილების გაზიარებაა.
