"დავით გარეჯის სამონასტრო კომპლექსის გადარჩენის პროცესში მსოფლიოს ცნობილი არქიტექტორები ჩაერთვებიან", - ეს განცხადება საქართველოს კულტურისა და ძეგლთა დაცვის მინისტრმა ნიკოლოზ რურუამ გააკეთა.
მისი თქმით, სამონასტრო კომპლექსის ნგრევას ხელი წლების განმავლობაში ახლოს მდებარე სამხედრო პოლიგონმა შეუწყო. წვრთნების დროს ვიბრაციის დონე მაღალი იყო, რამაც საძირკველსა და კელიებს ბზარები გაუჩინა.
"ეს კომპლექსი ყველაზე მეტად დაზიანდა მაშინ, როდესაც რუსეთის ჯარები იქ იდგნენ და ატარებდნენ სამხედრო არტილერიულ მანევრებს ათწლეულების განმავლობაში. იქ მიმდინარეობდა ყუმბარების გახეთქვა, დეტონაცია, ზარბაზნების სროლა და ამ ყველაფერმა მიგვიყვანა იმ შედეგამდე, რომელიც დღეს გვაქვს. სახელმწიფო გააკეთებს ყველაფერს, თუკი საჭირო გახდა, მთელი მსოფლიოდან ტექნოლოგებს, მეცნიერებს მოიზიდავს და დაიცავს ჩვენი ეროვნული მემკვიდრეობის ამ თვალსაჩინო ძეგლს", _ აცხადებს რურუა.
