„ეს არის მედიაზე მორიგი შტურმი ხელისუფლების მხრიდან და ძალიან ვწუხვარ, რომ ამ პოლიტიკურ შეტევაში ჩაერთო ფინანსთა სამინისტრო, - განაცხადა ტელეკომპანია „პირველის“ დირექტორმა ინგა გრიგოლიამ.
მისი თქმით, არჩევნების წინ, ხელისუფლება ცდილობს ის მედიასაშუალებები, სადაც ისმის თავისუფალი სიტყვა, მოაქციოს წნეხის ქვეშ.
„ეს არის მედიაზე მორიგი შტურმი ხელისუფლების მხრიდან და ძალიან ვწუხვარ, რომ ამ პოლიტიკურ შეტევაში ჩაერთო ფინანსთა სამინისტრო. დღეს „ქართული ოცნების“ ლიდერები აკეთებინ განცხადებებს, რომ ბიუჯეტში გადასახადები უნდა გადაიხადონ, რომ ტელევიზიის არსებობა, არ არის იმისი წინაპირობა ბიუჯეტის წინაშე არ იყოს კეთილსიდისიერი. რა თქმა უნდა, ჩვენც ამას ვითხოვთ და ვეთანხმებით, რომ ბიუჯეტის წინაშე ყველანი უნდა ვიყოთ კეთილსინდისიერები. 5 წლის განმავლობაში ტვ პირველი იყო საუკეთესო გადამხდელი. ერთ-ერთი ყველაზე კეთილსინდისიერი გადამხდელი, მაგრამ როდესაც ჩვენ ვხედავთ რომ მილიონობით ვალი აქვს ტელეკომპანია „იმედს“ ან „მაესტროს“, რომლებიც ხელისუფლების მიმართ ლოიალური განწყობით გამოირჩენიან, მაშინ სად არის სამართლიანობა. ჩააყენეთ ყველანი ერთ პოზიციაში გადაახდევინეთ ბევრი მილიონი იმ ტელევიზიებს, რომელთაც ამდენი წელია ვალად ადევთ ეს თანხა და მერე გველაპარაკეთ ჩვენ. ეს ინკასო ჩვენ არ გაგვწყვეტს, პირიქით მოტივაცია გაათასმაგებული გვაქვს. არჩევნების წინ, ეს არის ხელისუფლების მიერ კიდევ ერთხელ განხორციელებული შტრუმი იმისთვის რომ მედია, თავისუფალი სიტყვა სადაც ისმის, მოაქციოს წნეხის ქვეშ“, - განაცხადა გრიგოლიამ.
დღეს სამოქალაქო აქტივისტები და პოლიტიკოსები ტელეკომპანია „პირველთან“ შეიკრიბნენ დატელეკომპაების ანგარიშებზე ინკასოს დადება გააპროტესტეს. „სირცხვილიას“ ერთ-ერთი ლიდერის, გიგა მაქარაშვილის განცხადებით, ტელეკომპანია „პირველი“ „კავკასიასთან ერთად ხელისუფლების სამიზნეა და ამ სიაში როგორც ჩანს, ასევე მოხვდა „რუსთავი 2“.
25 დეკემბერს ცნობილი გახდა, რომ ტელეკომპანიების „პირველის“, „კავკასიისა“ და „რუსთავი 2“-ის ანგარიშებს ინკასო დაედო. გადაწყვეტილება ფინანსთა სამინისტრომ მიიღო, რომელმაც ტელეკომპანიებს მიმდინარე, პირველი ოქტომბრიდან მოყოლებული დავალიანებების გადასხადელად 24 დეკემბერს ერთდღიანი ვადა მისცა.