"ბათუმობა 2019“ მრავალფეროვანი ღონისძიებებით აღინიშნა. დღესასწაული ბულვარის კოლონადებთან, გრანდიოზული გალაკონცერტით დასრულდა.
საზოგადოების წინაშე წარდგნენ: ევგენი მიქელაძის სახელობის საქართველოს ეროვნული სიმფონიური ორკესტრი ნიკოლოზ რაჭველის ხელმძღვანელობით, ნანი ბრეგვაძე, ეკა მამალაძე, ლაშა ღლონტი, ლიზა ბაგრატიონი, ნატო მეტონიძე, ნინო ქათამაძე, სტეფანე მღებრიშვილი, ზვიად ბოლქვაძე, სოფო ბათილაშვილი, ნოდიკო ტატიშვილი, ნინა სუბლატი, თამარ ივერი, თემურ თათარაშვილი, მაია ჯაბუა, სოფო ხალვაში, დათო ევგენიძე და სხვები.
ბათუმობის ფარგლებში, ნაყოფიერი სამეცნიერო და საზოგადოებრივი მოღვაწეობისთვის, თბილისის იოანე ღვთისმეტყველის სახელობის ტაძრის წინამძღვარი, საქართველოს საპატრიარქოს წმინდა თამარ მეფის სახელობის უნივერსიტეტის რექტორი, მედიცინის მეცნიერებათა დოქტორი, პროფესორი, მრავალი სამეცნიერო კვლევისა და მონოგრაფიის ავტორი - არქიმანდრიტი ადამი (ვახტანგ ახალაძე) ბათუმის საპატიო მოქალაქის წოდებით დაჯილდოვდა.
ასევე, წარმატებული შემოქმედებითი მოღვაწეობისა და ქართული კულტურის პოპულარიზაციისათვის, ცნობილ ქართველ საესტრადო მომღერალს, საქართველოს სახალხო არტისტს, ბრწყინვალების საპრეზიდენტო და ღირსების ორდენების კავალერს, სახელმწიფო პრემიის ლაურეატს, თბილისის საპატიო მოქალაქესა და მრავალი საერთაშორისო ფესტიცალის ლაურეატს - ნანი ბრეგვაძეს, ბათუმის საპატიო მოქალაქის წოდება მიენიჭა.
