საერთაშორისო ორგანიზაციამ „რეპორტიორები საზღვრებს გარეშე“ 2019 წლის პრესის თავისუფლების ინდექსი გამოაქვეყნა.

საქართველო 28,98 ქულით, 180 ქვეყანას შორის მე-60 ადგილზე მოხვდა.

ორგანიზაციის მიერ გამოქვეყნებულ ანგარიშში კი საქართველოს შესახებ ვკითხულობთ:

„საქართველოში მედიაგარემო პლურალისტურია, თუმცა ის კვლავ რჩება პოლარიზებულად. ბოლო წლებში განხორციელებულმა რეფრომებმა, მედიამფლობელების გამჭვირვალობისა და სატელიტური ტელევიზიების პლურალიზმის ხარისხი გააუმჯობესა, თუმცა მედიამფლობელები ხშირად ახდენენ ჩარევას სარედაქციო პოლიტიკაზე.

ქვეყნის მთავარი ოპოზიციური ტელეკომპანიის, რუსთავი 2-ის ირგვლივ მიმდინარე სასამართლო დავის შედეგი დიდ გავლენას მოახდენს ზოგად სიტუაციაზე.

ჟურნალისტების მიმართა ძალადობრივი შემთხვევები შემცირებულია, თუმცა გარკვეული მუქარები ისმის მათ მიმართ.

2017 წელს აზერბაიჯანელი ჟურნალისტის აფგან მუხთარლის გატაცების საქმის გამოძიება ჯერ კიდევ არ იძლევა დამაჯერებელ შედეგებს. მუხთარლის საიდუმლოებით მოცული გატაცება თბილისიდან, რომელიც შემდეგ აზერბაიჯანის საპატიმროში აღმოჩნდა, შოკისმომგვრელი იყო საქართველოს მოქალაქეებისთვის, რომლებიც ტრადიციულად თავშესაფარს სთავაზობენ მეზობელი ქვეყნებიდან გადმოსულ დისიდენტებს“.

„პრესის თავისუფლების ინდექსის“ სათავეში არიან ნორვეგია, ფინეთი, შვედეთი, ნიდერლანდები, დანია, შვეიცარია, ახალი ზელანდია, იამაიკა, ბელგია და კოსტა რიკა.

სომხეთი 28,98 ქულით 61-ე ადგილზე, აზერბაიჯანი 59,13 ქულით 166-ე ადგილზე, რუსეთი 50,31 ქულით 149-ე ადგილზე, თურქეთი 52.81 ქულით 157-ე ადგილზე.

ყველაზე უარესი შედეგი აჩვენეს ვიეტნამმა, ჩინეთმა, ერითრეამ, ჩრდილოეთ კორეამ და თურქმენისტანმა.