„ევროკავშირი ისრაელის მიერ ოკუპირებულ ტერიტორიებზე ისრაელის სუვერენიტეტს არ ცნობს“, - აღნიშნული განცხადება ევროკავშირის უმაღლესმა წარმომადგენელმა საგარეო საკითხებში ფედერიკა მოგერინიმ განაცხადა.
ფედერიკა მოგერინის თქმით, ევროკავშირის ეს პოზიცია გოლანის მაღლობებზეც ვრცელდება.
„აშშ-მა გოლანის მაღლობები ისრაელის ტერიტორიის ნაწილად აღიარა. ევროპულ გაერთიანებას აქვს ძალიან მკაფიო პოზიცია აღნიშნულ საკითხთან დაკავშირებით. ვეფუძნებით რა საერთაშორისო კანონმდებლობასა და გაეროს უშიშროების საბჭოს რეზოლუციებს, ევროპული გაერთიანება არ აღიარებს ისრაელის სუვერენიტეტს იმ ტერიტორიებზე, რომელიც 1967 წლის ივნისიდან ისრაელის მიერ იქნა ოკუპირებული და ჩვენი ეს პოზიცია, რასაკვირველია, ვრცელდება გოლანის მაღლობებზეც. ეს არის პოზიცია, რომელიც ყოველთვის გვქონდა და ეს არასოდეს შეიცვლება“, - განაცხადა მოგერინიმ.
შეგახსენებთ, რომ ცოტა ხნის წინ, ამერიკის შეერთებულმა შტატებმა გოლანის მაღლობებზე ისრაელის სუვერენიტეტი აღიარა.
გოლანის სიმაღლეები 1967 წლამდე სირიის შემადგენლობაში შედიოდა. ექვსდღიანი ომის შემდეგ ისრაელის არმიამ ეს ტერიტორია დაიკავა. ამ დრომდე გოლანი ისრაელისა და სირიის კონფლიქტის ძირითად საგანს წარმოადგენს.
