საქართველოს კონკურენციის სააგენტოს თავმჯდომარემ ნოდარ ხადურმა კონკურენციის სამართლის საკითხებზე სემინარი გახსნა, რომელიც ამერიკის შეერთებული შტატების ვაჭრობის დეპარტამენტის კომერციული სამართლის განვითარების პროგრამის (CLDP), აშშ-ის ვაჭრობის ფედერალური კომისიის, აშშ-ის იუსტიციის დეპარტამენტის, აშშ-ის საელჩოს საქართველოში და საქართველოს კონკურენციის სააგენტოს თანაორგანიზებით იმართება, თემაზე „დომინანტური მდგომარეობის ბოროტად გამოყენების გამოვლენა და პრევენცია“. სამ დღიანი სემინარი საქართველოში აშშ-ის სახელმწიფო დეპარტამენტის დაფინანსებით ტარდება.
დამსწრე საზოგადოებას სიტყვით მიმართა ამერიკის შეერთებული შტატების საელჩოს ეკონომიკური სამსახურის უფროსმა, მაქენზი როუმ. სემინარს უძღვებიან: აშშ ვაჭრობის ფედერალური კომისიის საერთაშორისო ურთიერთობის ოფისის ასოცირებული დირექტორი, რასელ ვ. დამტოფტი; სქიფ მარკი, CLDP-ის ადვოკატის მრჩეველი; იჰან კიმი, აშშ-ის იუსტიციის დეპარტამენტის ადვოკატი.
აღნიშნულ სემინარში მონაწილეობას იღებენ: კონკურენციის სააგენტოს თანამშრომლები, მარეგულირებელი ორგანოების, ბიზნეს ასოციაციების, საკონსულტაციო კომპანიების და სხვადასხვა ბაზარზე მოქმედი ბიზნეს სუბიექტების წარმომადგენლები. სემინარზე განიხილება შემდეგი საკითხები: დომინირებული მდგომარეობის კონცეფცია; ბაზრის განსაზღვრება, საბაზრო წილები და საბაზრო ძალაუფლების მიმოხილვა; საქართველოში დომინირებული მდგომარეობის ბოროტად გამოყენების შემთხვევები, შეფასება, დაუშვებლობის პრევენცია; მტაცებლური ფასები, როგორც დომინირებული მდგომარეობის ბოროტად გამოყენების ერთ-ერთი ფორმა; რეგულირება და კონკურენცია, საგამოძიებო უფლებამოსილებები, ინსტიტუციური მოწყობა და სხვა. ღონისძიება 10-12 აპრილს, სასტუმრო „ბილტმორში“ იმართება.
