ბანგლადეშში ქალმა ტყუპები ერთთვიანი დაშორებით გააჩინა. 20 წლის არიფა სულთანამ, თებერვლის ბოლოს ბიჭი, ხოლო 26 დღის შემდეგ ტყუპები გააჩინა.
ექიმებმა აღმოაჩინეს, რომ პირველი ბავშვის დაბადების შემდეგ, ის კვლავ ინარჩუნებდა ორსულობას, რის გამოც სასწრაფო წესით ჩაუტარეს საკეისრო კვეთა. როგორც ექიმებმა BBC-ის ჟურნალისტს განუცხადეს, განცალკევების პროცედურა წარმატებით დასრულდა და ტყუპების ჯანმრთელობას საფრთხე არ ემუქრება.
არიფა სულთანა ბანგლადეშის უღარიბესი სოფლიდანაა. ეს მისი პირველი მშობიარობა იყო. თებერვლის ბოლოს, პირველი ბავშვის გაჩენიდან 26 დღეში არიფა სულთანა სხვა საავადმყოფოში, კუჭის საშინელი ტკივილებით მივიდა. ექმიებმა აღმოაჩინეს რომ ქალბატონი ტყუპებზე იმყოფებოდა ფეხმძიმედ.
„როდესაც პაციენტი საავადმყოფოში შემოიყვანეს, ჩაუტარდა ულტრაბგერითი კვლევა და აღმოჩნდა, რომ ის ტყუპებზე იმყოფებოდა ფეხმძიმედ. გაოგნებულები და შოკირებულები ვიყავით, აქამდე ასეთი რამ არასდროს გვინახავს“,- განაცხადა საავადმყოფოს მთავარმა გინეკოლოგმა შეილა პოდარმა.
უცნობია, თუ რატომ მიმართა პაციენტმა სხვა საავადმყოფოს, ან რატომ ვერ აღმოაჩინეს ექიმებმა პირველი მშობიარობის დროს კიდევ ორი განვითარებული ნაყოფი.
ექიმ შეილა პოდარის განცხადებით, პაციენტს წარმოდგენა არ ჰქონდა, რომ ტყუპებზე იყო ორსულად. მისი განცხადებით, ეს იყო პაციენტისთვის პირველი ულტრაბგერითი კვლევა.
20 წლის პაციენტი და მისი ტყუპები საავადმყოფოდან 25 მარტს გაწერეს. ბავშვებისა და დედის ჯანმრთელობას საფრთხე არ ემუქრება.
