არგენტინაში, უდაბნოში, თითქმის 24 საათი ეძებდნენ ბიჭს, რომელიც კვირას მშობლებთან ერთად სამოგზაუროდ იმყოფებოდა. მოხალისეთა ჯგუფმა, 5 წლის ბენჯამინ სანჩეზს, გაუჩინარების ადგილიდან 21 კილომეტრში მიაგნო. ამის შესახებ ინფორმაციას BBC ავრცელებს.
5 წლის ბიჭის სამძებრო სამუშაოებში ჩართული იყო 1000-მდე პოლიციელი, სამოქალაქო აქტივისტი და მოხალისე.
„ბიჭი ხის ქვეშ იჯდა. მან წყალი გვთხოვა. შევნიშნეთ, რომ ის შეშინებული იყო, თუმცა არ ტიროდა. ჩვენ ის დავარწმუნეთ, რომ ვერტმფრენში ჩამჯდარიყო, რადგან ფრენის ეშინოდა. ბიჭი დაგვთანხმდა, რადგან დედასთან შეხვედრა ძალიან სურდა“, - განაცხადა პროვინციის უსაფრთხოების სამსახურის უფროსმა გუსტავო ფარინიამ.
გამოცემის ცნობით, რაიონში, სადაც ბიჭი დაიკარგა, ხშირად ბინადრობენ პუმები, ობობები, მორიელები, გველები და სხვა საშიში ცხოველები. ასევე ამ ტერიტორიაზე ფიქსირდება ჰაერის ტემპერატურის მკვეთრი ცვლილება - დღისით +30°С ღამით კი 0 °С.
„მესმოდა დედა როგორ მეძახდა, მე კი გავრბოდი. შემდეგ დავიკარგე. ძალიან მციოდა, ცუდად მეძინა“, - თქვა ბენჯამინ სანჩეზმა.
ბიჭის თქმით, ის დაბინძურებულ წყალს სვამდა და უსიამოვნო გემოს მქონე მცენარეებით იკვებებოდა.
სანჩეზი, ორშაბათს, გაუწყლოების სიმპტომებით, სან ხუანის საავადმყოფოში შვეულმფრენით გადაიყვანეს, ხოლო დღეს გამოწერეს.
