გაერთიანებული ერების ორგანიზაციის ინფორმაციით, 2018 წელს ავღანეთში რეკორდული რაოდენობის მშვიდობიანი მოქალაქე დაიღუპა.
ავღანეთში გაეროს მისიის მიერ გამოქვეყნებული ყოველწლიური ანგარიშის თანახმად, 2018 წელს ავღანეთში მიმდინარე კონფლიქტის შედეგად, 3 804 მშვიდობიანი მოქალაქე დაიღუპა, ხოლო 7 189 მოქალაქე დაიჭრა. 2017 წელთან შედარებით 11 %-ით გაიზარდა შემთხვევების რაოდენობა.
ანგარიშის თანახმად, 63 პროცენტის შემთხვევაში მოქალაქეთა დაღუპვა ან დაშავება გამოწვეული იყო თალიბანის ან ისლამური სახელმწიფოს თავდასხმების შედეგად. 24 % კი აშშ-ისა და ნატო-ს სამოკავშირეო ძალების მიერ გაწეული სამხედრო მოქმედებების დროს დაიღუპა ან დაიჭრა.
ანგარიშში ასევე აღნიშნულია, რომ აშშ-ი და თალიბანი გეგმავენ მოლაპარაკებების შემდგომი რაუნდის გამართვას კატარში, რათა ბოლო მოეღოს ავღანეთში დაუსრულებელ სამხედრო კონფლიქტს.
