ამერიკის შეერთებულ შტატებში ვიზიტის ფარგლებში განხილულ იქნება ჩვენს მთავარ სტრატეგიულ პარტნიორთან ორმხრივი ურთიერთობის ყველა მნიშნველოვანი მიმართულება, როგორც თავდაცვის და უსაფრთხოების სფეროში თანამშრომლობა, ასევე ეკონომიური მიმართულებით, თავისუფალი ვაჭრობის შესაძლებლობის განვითარების კუთხით. რაც ყველაზე მნიშვნელოვანია, ჩვენ ვისაუბრებთ რეგიონში შექმნილ სატურაციასა და არსებულ გამოწვევებზე, - განაცხადა დავით ზალკალიანმა ვაშინგტონში ვიზიტის დაწყებისას, სადაც იგი საქართველოს პრემიერ მინისტრთან, მამუკა ბახტაძესთან ერთად იმყოფება.
მინისტრის განცხადებით, ძალიან მნიშვნელოვანია, რომ ამერიკის შეერთებულ შტატებში ვიზიტი ხორციელდება გაეროს გენერალური ასამბლეის წინ, საქართველოს პრემიერ მინისტრის დანიშვნიდან უაღრესად მოკლე პერიოდში.
დავით ზალკალიანმა ასევე აღნიშნა, რომ ვიზიტის ფარგლებში დაგეგემილია მნიშვნელოვანი შეხვედრები გადაწყვეტილების მიმღებ პირებთან, მათ შორის აშშ-ის ეროვნული უშიშროების საბჭოს მდივანთან, სახელმწიფო მდივანთან, საკანონმდებლო ხელისუფლებისა და ანალიტიკური ცენტრების წარმომადგენლებთან.
„მოგეხსენებათ, რომ აშშ აქტიურად არის ჩართული უმწვავესი გეოპოლიტიკური პროცესების მოწესრიგების საქმეში და ბუნებრივია ჩვენს როლს და ადგილსაც ვხედავთ ამ მიმართულებით. აუცილებელია, რომ ჩვენს მთავარ სტრატეგიულ პარტნიორთან გვქონდეს ყველა ამ საკითხზე ძალიან ახლო კოორდინაცია და თანამშრომლობა." - განაცხადა საგარეო საქმეთა მინისტრმა.
დავით ზალკალიანი 16-21 სექტემბერს საქართველოს პრემიერ-მინისტრის მამუკა ბახტაძის ვაშინგტონში ვიზიტის ფარგლებში შეხვედრებს გამართავს აშშ-ს სახელმწიფო მდივნის მოადგილესთან პოლიტიკურ საკითხებში დევიდ ჰეილთან და სახელმწიფო მდივნის თანაშემწის მოადგილესთან ჯორჯ კენტთან.
პრემიერ-მინისტრის ვაშინგტონში ვიზიტის ფარგლებში დაგეგმილია საქართველოს მთავრობის მეთაურის და საქართველოს დელეგაციის უმაღლესი და მაღალი დონის შეხვედრები აშშ-ს პრეზიდენტის მრჩეველთან ეროვნული უსაფრთხოების საკითხებში, ჯონ ბოლტონთან და აშშ-ს სახელმწიფო მდივანთან, მაიკლ პომპეოსთან. მამუკა ბახტაძე შეხვდება აშშ-ს კონგრესის, არასამთავრობო და საექსპერტო წრეების, მედიისა და ბიზნესის წარმომადგენლებს. ასევე, გაიმართება შეხვედრები აშშ-ს საერთაშორისო განვითარების სააგენტოში (USAID), ათასწლეულის გამოწვევის კორპორაციაში (MCC), აშშ-ს უცხოური კერძო ინვესტიციების კორპორაციაში (OPIC), მსოფლიო ბანკსა (WB) და საერთაშორისო სავალუტო ფონდში (IMF).
